Sorkarin kum bul ṭan hma se

Kum 2021 kan chuang kai leh ta a, sorkar chawlh bik chu kan hmang ral leh ta a, January 4 (Thawhtanni) aṭangin sorkar pisate chu hna thawn ṭan leh nghal tawh tur an ni.

Mizote hi kum hlui thlaha lungleng ṭhin kan ni a, Krismas hunpui kan hmang zo hlim bawk nen, kum bul ṭan hi kan harsat ṭhin hle. Kut ṭiak ngang kan ni bawk a, kum thara phur taka hnathawh ṭan leh nghal hi chu thil harsa tak a ni a, hna hi kan thawk chhunzawm har ṭhin hle a ni.

Hetihlai hian ram changkanga hnampui zawkte chu sawi loh, India rama kan thenawm state-te pawh hian keini ang em emin kum bula hnathawh ṭan hi an harsat vak lo niin a lang a, kum bul a inṭan hi chuan an hna ngai hi an chhunzawm leh nghal vat ṭhin. Keini hunpui ngaia lungleng  reng renga kan awm hlanin hna min lo thawhsan a, hengte vang pawh hi a ni mai thei, state hmasawn lo pawlah hian kan awm rei ta hle a ni.

Mizo mipui zawng zawngte hnathawk ṭan nghal tura kan siam thei lo a nih pawhin sorkar hnathawk lam tal hi entawn turin awm thei se; sorkar hnathawkte hi anmahniah aṭanga kum bula hnathawk ṭan hma tura tumna a awm lo palh a nih pawhin sorkarin thupek khauh zawk nen kum bul aṭangin office hour hi dik takin a nihna angin kalpui thei se awmzia a nei ngei ang.

Sorkarin hripui avangin hun rei tak hnathawhna hun ṭha a lo hloh tawhte pawh eng emaw chen chu a kêp (cover) theih dan a awm mai thei a; sorkar hnathawkte tal hian kum bulah hna hi ṭan hma se, he hnam hi hun kal tawh ngaia ṭhu ngui reng loin kum tharah hna i thawk ṭan nghal ang u.