Ni za inhlawhnaah kalphung thar

Sorkar laipui thu angin ni za inhlawhna tia hriat Mahatma Gandhi National Rural Employment Guarantee Scheme hnuaia inhlawhnaah, hna thawh ṭan tirh leh thawh zawh hnuah hna thawktu/inhlawhte thla lak zel tur a ni a, thlalakah mihring ngai vek an lan loh chuan hlawh pek theih a ni dawn lo tih RD Minister-in July 28, 2025 khan a sawi. Ni khatah darkar 8 tal hna thawh a ngai tawh dawn tih a sawi bawk.

MGNREGS-ah kalphung khauh zawk anga langa kal tura sorkar laipuiin a ruahman hi a chhan ngaihtuah zui theih tak a ni. Thil ṭha zawk duh vang a nih a rinawm a, mihring rilru siam dik tumnate pawh a ni tel hial mai thei.

Mizorama ni za inhlawhna kalpui ṭhin dan leh job card neite inhlawh ṭhin dan ngaihtuah phei chuan, sorkar laipui hian kalphung a siam tharah hian Mizoram a rawn bitum em ni chu aw, tih mai a awl rum rum.

MGNREGA hi Mizoramin nasa takin a chhawr tawh. Mizorama mi tam takin an chhawr a, a bik takin thingtlanga khawsak harsate tan a ṭangkai hle a, chhungkaw khawsak rêlnaah nasa taka puitu a ni.

Hetih rual hian, mi tam tak chuan ni za inhlawhna hi dâwngdahna thlentu-ah an ngai ve thung. Hna thawk tak tak si lo, hna thawk anga siam rema sum lak luhnaah an ngai a, chu chuan thawk mang loa sum lak luh duhna a siam a, mihring rilru a piansualtirah an ngai a ni. Dik lo tawp chu a ni bik lo ang.

Sorkar laipuiin ni zan inhlawhna kalphung a siam thar hi mi ṭhenkhat chuan khirh an ti mai thei. Mahse, ram leh hnam tan leh, job card neitute leh nei lote thleng pawhin thil ṭha zawk thlentu a nih ngei a rinawm.

Political party leh mi ṭhenkhat chuan Mizorama sorkar lai party leh a enkawltu Minister demna remchangah an la hmang duh mai thei. Politics thila indemna leh inbeihna atan hmang lo ila a ṭha awm e.

Sorkar laipuiin lo ti ta lo pawh ni se, state sorkar hian khauh zawka a kalpui a ṭul ve hrim hrim mai a; chuvangin, MGNREGS hi sorkar leh a enkawltute'n dan ang tak leh dik takin kalpui rawh se.