Revenue department ṭang sauh sauh se

Land Revenue & Settlement department chuan e-RAM portal an siam a, chumi kaltlanga LSC siam hmasak ber pahnih, Record of Rights (digitally-signed) tia sawi chu July 29 khan Revenue Minister-in ram neitute hnenah a hlan.

e-RAM portal hi mipui awlsamna tura siam a ni a, Revenue department pisaa kal kher loa online hmanga ram teh, hming thlak, ram ṭhen leh dilna hrang hrang thehluh theih a ni. Dilna lutte chu a hmasak dan indawtin an buaipui a, ram teh ngaite chu empanelled surveyor-te'n an teh a, e-RAM portal hmang vêkin buaipui ṭhina sawi a ni.

Information technology te, online leh application hman dante Mizoram mipuiin kan hman thiam dan a inchen lo; hmang thiam tak tak an awm laiin, hmang thiam miah lo, tihngaihna hre lo hulhual pawh mi tam tak an awm ngei ang.

Online platform hmang thiamte tan pisaa kal kher ngai loa e-RAM portal hmanga Revenue department dawr theihna leh LSC/ROR siam theihna remchang a awm hi a ṭha a, a lawmawm. Mi tam tak tan awlsamna siamtu a ni a, hun, thâ leh zung, sum leh pai senso titlahniamtu a ni. e-RAM hmang thiam lote tan pawh remchanna siamtu a ni tho tho àwm e.

Ram pass siam chungchanga Revenue department dàwr turte chuan e-RAM portal hi hman ṭangkai nachang hre ṭheuh ila. Tuna hmang thiam mai lote pawh a theih ang angin inzirtir ni thei se; Revenue department vêk hian a hman dan inzirtirna darh zau zawkin tichhuak thei se mipui tan a ṭangkai hle ang.

Land Revenue & Settlement department hi department ṭawpa sawi a ni ṭhin a, mi tam tak chuan sorkar department zinga ṭawp berah an ngai hiala sawite pawh a awm. Heng hi a dik vek lo a nih pawhin, a dikna chin thui tam a awm a nih a rinawm.

Mi tam takin department ṭawp ber anga Revenue department an ngaihna hi tihtawp an tum tur a ni. A ṭawp lai thian fai turin a enkawltu minister bakah, department official hotu lu ber aṭanga a hniam ber thlenga ṭan an lak a ṭul. Minister leh hotu lu lamte'n mawhphurhna an nei sang zual a, huaisen takin, theihtawp chhuahin ṭan han la sauh sauh teh se.