CSS hnuaia thawkte dah ngheh thu

Mizoram Contract Health Workers Association (NHM) member-te chu July 30, 2025 khan CMO gate bulah an pungkhawm. State sorkarin health worker (regular) 100 a lak turah NHM hnuaia thawk mekte aṭangin 50 tal la turin sorkar an phût.

Hetih lai hian sorkar chuan, sorkar hna lakah a bika induhsakna siam chu Indian Constitution kalh a nih avangin a remchang loh thu leh, NHM health worker-te tan reservation siam a remchan loh thu a tarlang.

NHM hnuaiah contract-a hun rei tak tak thawk tawh eng emaw zat an awm a, a ṭhen chu kum 20 vel lai thawh tawhte an ni; chung zingah chuan health worker tam tak an awm. An ṭhat lai, an vanglai hunte sorkar tana lo thawk tawhte an ni hlawm.

NHM a ni emaw, CSS dang hnuaia thawkte hian state sorkarah ngheh an beisei deuh vek a, chu chu mi tam tak chuan nghakin, an vanglai hun an hmang liam a ni. Sorkara ngheh an beisei hi a àwm em em a, an chungchang hi sorkar pawhin ngun taka a ngaihtuah a ṭha.

Sorkar lamin NHM contract health worker-te tan reservation siam a remchan loh thu an sawi hi a àwm em em. A tling leh tlak, a ṭha apiang sorkar hna thawk tura lak hi thil dik leh ṭha a ni a; ṭhalaite duh dan pawh a ni a, hetiang hian hna lakna reng reng kalpui zel a pawimawh.

Hetih lai hian, sorkar chuan a duh chuan The Government of Mizoram Regularization of Centrally Sponsored Scheme (CSS) Employees Scheme, 2024 hmangin CSS hnuaia thawkte a dah nghet thei. A duh phawt chuan direct recruitment ti rih loin, he dan hmang hian NHM health worker-te a dah nghet thei ngei ang.

Mizoram sorkar hian CSS hnuaia hun rei tak thawk tawh, an vanglai hun zawng zawng hmang tawhte a duhsak ve hi a àwm a, a tling leh tlakte chu CSS Regularization Scheme hmangin dah ngheh dan ngaihtuah a hun tawh viauah ngaih theih a ni.

Chutih rualin, NHM leh CSS dang hnuaia lak, advertisement chhuah lo leh competition paltlang nei miah loa lak, dan loa lak, duhsak vang liau liaua lak eng emaw zat an awma sawi a ni a; fimkhur erawh a ṭul ang.