Ráltlânte leh biometric enrolment

Ṭhenawm ram aṭanga sahimna zawnga Mizorama rawn ráltlânte chhinchhiahna, biometric enrolment chu Ministry of Home Affairs thu angin July 31, 2025 khan district hrang hrangah ṭan a ni.

MHA chuan ráltlânte chhinchhiahna atan portal a siam a, portal awm sa chu hmang loin, Mizoram sorkar duh dan angin MHA chuan portal thar National Infomatic Centre (NIC) a siamtir. Biometric enrolment tih mekah hian Myanmar aṭanga rawn lutte buaipui phawt a ni ang a, an awmna hmun/khuaah kal chilhin, an mit nautê thla leh kutze thlak lak zel a ni dawna sawi a ni.

Biometric enrolment hmanga mumal taka ráltlânte chhinchhiah ṭan a ni ta hi a lawmawm a, hun kal zel tur atan Mizoram leh Mizo mipui tana ṭha zawk tur a nih ngei a rinawm.

Ṭhenawm ram aṭanga Mizorama rawn ráltlânte hi ram dang mi, nationality hrang an nih miau avangin mumal taka chhinchhiah an ngai a; Zo hnahthlak ni deuh vek mah se, India khua leh tui an nih miau loh avangin hamṭhatna dawn theih hrang hrangah pawh inthliar loh theih a ni lo.

Raltlante hi Mizo ve tho an nih miau avangin inhriat hran vek theih a ni lo a; chu chu remchangah hmangin, khua leh tui dik takte ang maiin an duhna hmun apiangah an kal ṭhin a, an awmna ram nen an duh hun hunah an kàr tawn ṭhin a sawi a ni.

Raltlante awm dan tam tak chu Mizoram leh mipui tan a ṭha lo thei a, a him lo thei bawk. Biometric enrolment tih vek a nih chuan ráltlânte awmna chin hriat a awlsam ang a, Myanmar leh Mizoram an kàr tawn chhên venna atan pawh a ṭangkai ngei ang. Chuvangin, biometric enrolment hmanga ráltlânte mumal taka chhinchhiah hi a ṭul.

Biometric hmanga ráltlânte chhinchhiahna hi fimkhur tak leh ukul taka kalpui ni se, a buaipuitute an fimkhut viau a ṭul ang. Raltlan zinga tam tak chu ramri hnaih khuaah an awm a, a bik takin ramri hnaih khuaah fimkhur a ṭul lehzualin a rinawm.

Biometric enrolment-ah hian raltlan zingah chhinchhiah hmaih an awm loh nan thawkute'n theihtawp chhuah se; ráltlânte awmna khua/venga village/local council te, tlawmngai pawlte leh mipui pawhin sorkar hmalakna a theih ang angin lo ṭawiawm se a ṭha hle ang.