State capital sawn tuma inpuh

MNF General Secretary pakhat chuan chuan August 1, 2025-a an party inkhawmah, Mizoram sorkarin a rûkin Mizoram state capital chu Aizawl aṭangin Thenzawlah sawn tumin hma an la niin a sawi a, sawifiah turin Chief Minister a phût. Hemi chungchangah hian MNF chuan an ṭan chhan sorkar lehkha (document) an thehdarh nghal.

MNF-in document a tihdarhah chuan, April 24, 2025-ah Housing and Urban Affairs (AMRUT-IIB) Section Officer-in Mizoram Chief Secretary leh Resident Commissioner hnenah, 'Shifting of State Capital from Aizawl to Thenzawl, Mizoram' DPR siamna tur chungchang lehkha a thawn tih a lang. Lehkha dang ṭhenkhatah a lang bawk.

Mizoram CM-in Thenzawlah mi nuai 10 chuang chen theihna tur Peace City din tum a nih thu a sawi tawh ṭhin. Chumi atan chuan CM-in sorkar laipui hotute pawh a dàwr tawh bakah, bul ṭanna atan sum eng emaw zat ruahmana sawi a ni.

CM-in Thenzawl Peace City din tum thu a sawi ṭhinah state capital sawn tum a nih thu a la sawi ngai lo niin a lang. Chutih laiin, sorkar document-ah, 'Shifting of State Capital from Aizawl to Thenzawl, Mizoram' tih a awm tâkah chuan MNF hian sorkar beih nan leh politics ball atan an hmang nghal chat a ni mai thei.

Sorkar document an tihdarh hi a dik ngei a rinawm, mahse, state capital sawn hi thil harsa tak a ni. Thil lian tham lutuk a nih avangin ruahmanna mumal tak neia Cabinet-in a pawmpui phawt a, State Legislative Assembly pawhin a pawm phawt a ngai hialin a rinawm.

State capital meuh sawn tur chuan mipui rilru sûkthlêk ngaihtuah tel a pawimawh. Mipui tam tak pawm theih hauh loh tur thil a nih chuan tih chi a ni dawn hauh lo a, politician-te tan phei chuan a tih chi loh lehzual ang. Sawn tum tak tak pawh ni se, thil harsa leh hautak lutuk, tihpuitlin harsa tak a ni ngei ang.

Chhan hrang hrang avangin Mizoram sorkar hian state capital hi sawn a tum ngawtin a rinawm lo. Sorkar lehkha inthawn vela state capital sawn tumna a awm anga ngaih theih pawh hi state sorkar hotute leh central ministry hotute indawr tawnna velah thil inhriatsak fuh loh a awm a nih a rinawm mah zawk e.