Chak takin kawng thawm ṭha rawh se

Hun eng emaw chen chu Mizoram mamawh tinrêng lak luhna kawngpui ber, Kawnpui leh Khamrang inkara chhe lutukin state pum min tibuai ta a. Thil chi hrang hrangah mipuiin harsatna kan tâwk a, na tak taka sorkar sawiselna pawh hmuh leh hriat tur a tam viau tawh. Heng karah hian state sorkar lam pawhin ṭan an la ve zel bawk.

Tun hnaia thuneitute leh pawl ṭhenkhatte ruahman dan chuan, lirthei tangkhangte a theih ang angin chhuahtir a ni a; nimin khan lung leh khawlte thiar luh niin, vawiin aṭangin kawng siam beihpui thlakna hnatlangpui ṭan a ni dawn. Hnatlangpuiah hian Kawnpui, Sairang Khamrang leh Mualkhang VC-te leh YMA-te huaihawtin mipui hnatlang tura beisei an ni a, mipui hnatlangte chu sorkarin lawmman a pe dawn a ni.

Kan mamawh tinrêng lak luhna kawngpui pawimawh em em mai lirthei tlan hleih theih loha a chhia hi a zialo em em a, mi tam takin nasa taka sorkar an sawisel pawh a àwm em em. State sorkar hi NH kawngpui enkawltu ni tawh lo mah se, Mizoram chhung a nih avang leh mipui tawrhna thlentu a nih miau avangin state sorkar mawhphurhna a awm lo thei lo.

Kawngpui chhiat nasat vanga insawisel chiam chiam hi thil àwm tak a nihna lai a awm rualin, thawklehkhata siam ṭhat nghal thut thut theih a ni lo tih erawh thil chiang a ni a; hei hi mipuiin kan hriat ve a ngai.

Lirthei tlân reng tho a ṭul ṭhin avangin kawngpui chhia thawm ṭhat hi duh ang taka chakin a thawh theih loh ang tih a rin theih. Chuti chung chuan sorkar leh NH kawngpui enkawltu NHIDCL lamin theihtawp chhuah zel se, kawng thawm ṭhat hi tuna zawh hun tur ruahmanah zawh ngei a nih theih nan ṭan la sauh sauh rawh se.

Chak zawka kawng thawm ṭhat hna thawh a nih theih nan tun August 4-9 chhung chu commercial vehicle-te Kawnpui leh Sairang inkarah an tlân dawn loa sawi a ni. He hun remchang hi sorkar leh NHIDCL lam hian bawhpelh miah lo turin theihtawp chhuahin hma la ngei teh se.