Assam hmalaknaah inrálrin a ngai e

Central YMA chuan July 28, 2025-a thuchhuah an siamah, Assam sorkarin ram dang mi dan loa an state-a awmte hnawh chhuah a tum avangin, an hnawh chhuahte chu Mizoramah an rawn luh loh nan Inner Line Permit pekah fimkhur turin sorkara thuneitute an ngen a; state ramri hnaiha awm YMA-te a ṭul anga hma la turin an chah bawk.

Assam sorkarin an state-a dan loa ram dang mi awm a hnawh chhuah a tumte chu Bangladesh aṭanga lutte an ni tlangpui a; Bangladesh foreigner mi tam tak dan loin an awma sawi a ni.

India ram mipui tluklehdingawn chuang fé zingah Mizorama cheng chu 0.1% vel chauh kan a ni a, kan la tlem em avangin Mizorama chêng tribal-te hi a bik taka humhim ngai kan la ni reng a, ram mipui venhimna atan ILP a la pawimawh reng a ni.

Mizoramah hnam dangte enfiah an nih apiangin ILP nei lo leh ILP thi tawh, dan loa awm tam tham tak hmuh chhuah a ni ziah ṭhin. Tunah pawh hian kan rama hnam dangte hi an ILP endik ni ta se, dan loa awm an tam hlein a rinawm. Sorkara thuneitute hian YMA emaw, zirlai pawlte emaw thawhpuiin zing zawkin ILP endik rûnpui nei ṭhin se a duhawm.

Hna thawk tura hnam dang chah luttu (sponsor)-te'n mawhphurhna sang tak an nei a; an mawhphurhna leh tih turte ṭha takin hlen se, an sponsor hun a zawhin chhuah zalên tawp mai loin, an khaw lamah thawn haw ṭhin se. Chutianga ti lote chu sorkar pawhin thunun ṭhin se, awmzia a nei ang.

ILP pek chhuah chungchangah fimkhur a ngai tak zet a, sorkar a khawng lehzual a ngai. Hnam dang, tribal ni lote Mizoramah dan loa an awm lohna tur hian sorkar hi mawhphurhna neitu a ni a, chu a mawhphurhna chu ṭha taka a hlen chhuah a ṭul. Sorkar hnathawk, ILP pangngai leh temporary ILP pe chhuaktute han fimkhur lehzual teh se.

Central YMA-in ILP chungchanga ngenna a siam hi a pawimawh hle mai a, sorkara thuneitute'n ngai pawimawhin bawhzui ngei se. Assam lam ramri hnaiha awmte hnena CYMA-in a ngenna pawh ngaih pawimawh ngei a ṭul bawk.