Hriatpuina pek chhuaha fimkhur
Lawngtlai District Magistrate-in tun hnaia hriattirna a chhuahah, certificate hrang hrang dilnaa VC leh YLA ten hriatpuina an pekah VC/YLA seal chhu a, hming ziak (sign) a, letterhead ruak (blank) pe chhuak ṭhin an awm tih a tarlang. DC office lamah thil dik lo an lo hmu chhuak hi a lawmawm.
Magistrate hian VC leh YLA hrang hrangte chu tribal certificate, residential certificate, income certificate, etc. dilnaa hriatpuina an pek chhuahah fimkhur tur leh form dahkhah lohte chu sign tawh lo turin a hriattir a ni.
Lawngtlai District Magistrate hriattirna thuchhuaha a tarlan hi a dik ngei a rinawm a; VC leh YLA zingah dan loa thil ti an awm ṭhin hi a zialo tak zet a, ram leh hnam pawi khawihna a ni. District dangahte pawh hetianga dan loa thil tih ang chi hi a awm ngei a rinawm.
VC leh LC te, YMA, YLA, MTP leh pawl dangte hi hriatpuina lehkha pek chhuahah an fimkhur a ṭul tak zet. Tunlaia raltlan boruak velah fimkhur a ṭul lehzual. India khua leh tuite'n an dila an neih chi certificate dilnaa hriatpuinate phei chu khua leh tui dik takte hnenah chauh lo chuan pek hauh loh tur a ni.
Birth certificate, tribal certificate, residential certificate, income certificate leh lehkha pawimawh dangte hriatpuina pek chhuahah fimkhur loh vang leh dan loa thil tih vangin ram leh hnam pawi khawih theih a ni tih hriat a pawimawh tak zet.
Certificate chi hrang hrang dilnaa hriatpuina pek chhuahah hian khawtlang hruaitute hian ram leh hnam hmangaihna thinlung nei chung leh, ram himna ngaihtuah chungin thil an ti tur a ni. Hriatpuina an pek hmain a diltute nihna leh dinhmun dik tak hriat an tum tur a ni a, hriat chian loh hnenah chuan an pe mai tur a ni lo.
VC/LC leh hriatpuina pe chhuak ṭhin NGO-te an pawimawh em em a, anni hi a bulṭhut an ni a, a bulṭhut aṭang hian a dik tur a ni. A bulṭhutah a dik loh tawh chuan a kal zelnaah thil dik lo hmuh chhuah a harsa tawh ṭhin.
Certificate dilna dawngtu sorkar official-te pawh an fimkhur hle reng a ngai a; VC/LC leh NGO-te'n hriatpuina an pek chhuah tawh pawh ni se, a dik leh dik loh a theih chin chinah uluk thei ang berin enfiah zel rawh se.