GST-ah theihtawp chhuah rawh se

Tun sorkar kum kal meka thla hman zawh tawh chin–April, May, June leh July thlaahte kum hmasa lam aiin Goods & Services Tax a tlahniam vek a, a tlakhniam dan pawh 20% chung lam vek a ni.

Mizoram sorkarin chhiah chi hrang hrang a la a, chhiah a hmuhna lian ber chu GST a ni. GST aṭanga sum hmuh hi chhiah hmuh zawng zawng aṭangin a zatve aia tam daih a ni ṭhin. Hei hian GST pawimawhzia leh GST aṭanga chhiah hmuh ṭhat a pawimawhzia a a tichiang hle.

GST aṭanga chhiah hmuh ṭhat a pawimawh em em laia kumin sorkar kum kal meka thla kan hman tawh chinah nikum kan pha lo vek mai leh, a phak lohna 20% chung lam vek a ni hi a zialo tak zet a; state-in a tuar ngei ngei ang. Kan state GST hmuh zat tlahniam hi sorkar laipui aṭanga sum hmuh zat pawhin a tuar lo thei lo ang tih a rin theih.

Chuvangin, GST aṭanga sum hmuh a pun leh theih nan ṭan lak a, theihtawp tak meuh chhuah a ṭul. GST hmuh zat a tlakhniam chhan zawn chhuah a ngai a, tih tur tih loh te, tih loh tur tihte pawh zawn chhuah a ngai ang.

GST tlakhniam chhan hi sorkar hotute leh Taxation official-te chuan an hre rengin a rinawm a, insiam ṭhatna tur pawh an hre chiang ngei ang. A pawimawh ber chu insiam ṭhat ngam a ni. Kum hmasa lama GST hmuhna ṭha tak ni ṭhin, tuna awm ta lo duak a awm a nih chuan kalphung thlak a ngai tihna a ni a, ram tana ṭha tura inthlâk danglam ngam a ngai.

Taxation hotute chuan GST aṭanga state sorkarin sum a hmuh zat a pun leh theih nan theihtawp chhuaha hma an lak dawn thu an sawi a, a lawmawm. Sawi ringawtah tawp loin, a takin hma la ngei se; GST hmuh zat a pun leh theih nan, hmasawn zawnga a kal zel theih nan theihtawp chhuah rawh se.

Mizoramah GST registration nei 10,000 vel an awma ngaih a ni a, sumdawng, dawrkai leh thil dang ti GST pe thei tur tamzia ngaihtuahin, heti lek tur hi a ni lo ang. GST pe turte'n an pek vek theih nan Taxation lam an ṭan lehzual a ngai a ni.