Dan kalha damdawi hralh

HFW department-a Food and Drugs Administration (FDA)  hotute sawi danin, damdawi zawrh phalna general licence nei zingah dan loa damdawi hralh an tam a, Aizawla damdawi zuar zingah an tam zual. Damdawi zuarte'n dan loa damdawi ruih theih an hralh zingah khuh damdawi a tam ber.

Damdawi hi damlo enkawlna atana ṭangkai tak a nih laiin, doctor-te'n an chawh ang ni loa hman chuan hlauhawm tak a ni an ti. Hei hi damdawi zuarte hian an hre chiang hle vekin a rinawm a; chuti chunga dan loa an hralh duh hi chu ram leh hnam pawisawina lian tak a tling a, a pawi hle.

Mizoramah hun rei tak damdawi zuar tawh, hmuh theiha hausa thûr thûra lang lêm lo tam tak an awm laiin, hausa chak bik riau an awm nuala sawi a ni ṭhin a; an hralh tam bik viau vang nge, dan loa damdawi a hlâwma hralh a tel vang tih erawh hriat a ni lo.

Drug licence neia damdawi zuarte hian sumdawng lutuk rilru an put loh a pawimawh; sumdawng rilru lian tak púa hlâwk lutuk an tum chuan dan loa thil tih, dan loa damdawi hralh a hring chhuak ṭhin tih a lang. Dan ang taka damdawi an hralh hian hlâwkna tam tak a awm tho a, chu chu lungawipui thiam se a ṭha hle ang.

Damdawi zuarte hian mawhphurhna an nei a, chu an mawhphurhna chu an hriat reng a pawimawh a; an tih tur leh tih loh turte an zâwm ṭha tur a ni. Dan loa thil an tih avangin mi tute'n emaw nasa takin an tuar thei a ni tih thinlunga an vawn reng a ṭul tak zet.

Sorkar lama thuneitute pawh an chêt chak a ngai; damdawi dawrte an vil ṭhat lehzual a ṭul a, zing zawkin damdawi dawrte an endik a ṭul hle tih a lang. Dan loa damdawi hralhtute chu khawngaihna tel loa dan ang taka hrem hmak hmak a ṭul bawk.

Dan kalha damdawi hralh a nih lohna tur hian ar vên taka invên sên a ni lo. A pawimawh ber chu damdawi zuarte'n dan an zawm ṭhat a ni a, dan pawh an hre vekin a rinawm. An chungah mawhphurhna lian tak a innghat a ni tih hre reng chungin damdawi zuarte hian damdawite hralh ṭhin rawh se.