Ruihhlo do nasat a ṭul

23 Sector Assam Rifles chuan Ruihhlo do runpui an neih tur 'Anti Drug Campaign' an tih chu tun hnai khan an hawng. India ramah mihring cheng zat aṭanga chhutinMizoram hi ruihhlo ti tamna ber anga chhinchhiah a ni mêk.

Kan ram dinhmuna thil duhawm lo tak pahnih chu ruihhlo a hluar em em mai leh HIV/AIDS a pung chho zel hi a ni awm e. Heng thil pahnih hi a inzawm tlat lehnghal a, hei hi thapui thawha kan do a nih ngawt loh chuan kan ram hmabak hi a êng lo hle tiin a sawi theih ang.

Tunlaiin khawpuiah mai pawh ni lo thingtlang khaw lian deuhahte pawh ruihhlo hi a hluar hle niin an sawi a, mi ṭhenkhat chuan sorkarin zu a khap leh tâk avanga ruihhlo hluar tharah an puh a; nimahsela sorkarin zu zawrh phalna a pek lai pawh khan ruihhlo hi chuan rêm lam a pan lo a, a hluar chho deuh deuh niin a lang.

Heti taka ruihhlo a hluar chhan hi zir chianna lam aṭangin chhan hrang hrang an sawi ṭhin a, kan ram awmna hmunin a zir loh avangin khaw chhak aṭangin zalen angreng takin ruihhlo a lo lut thei tih sawi ṭhin a ni a, hetihlai hian state pawn aṭanga damdawi ruihtheih kan lakluh danah hian kan ram awmna (location) lam aiin kan nunphung (lifestyle) hian zir lo tel tih phat rual a ni lo ang. India hmar chhak state dangte pawhin ruihhlo leh HIV/AIDS hi buaipui ve bawk mah se, heti taka kan ramah heng thil ṭha lo pahnih a zalen ta mai hi kan inenfiah a ngai takzet a ni.

A chhan zawn chhuah tuma puh tur zawn chuan kawh tur chu kan hmù ngei ang, a pawimawh ber erawh chu mahni leh kan chhungkua ṭheuh inenkawl ṭhat hmasak hi a ni a; chumi hnuah chuan tlawmngai pawl, kohhran leh sorkarin inthuruala thapui thawha ruihhlo hi kan do a hun ta takzet a ni.