Larsap thutlukna leh Court thutlukna

Gauhati High Court chuan August 8, 2025-a thutlukna a tihchhuahah, Lai Autonomous District Council chief executive member atana Mizoram Governor-in N Zangura a ruatna a hnâwl (cancel) a, CEM aṭanga chawlhtir tâk V Zirsanga chu CEM ni zui turin a ti. V Zirsanga kaihhruai sorkar chu chawlhkar hnih chhunga fiah turin a ti bawk.

V Zirsanga kaihhruai LADC sorkar kha floor test hmanga paih awm loin Mizoram Larsapin CEM turin N Zangura a ruat hnan a, May 8, 2025-ah CEM atan lak luh a ni. Governor chuan V Zirsanga hoa April 17-22, 2025 chhunga budget session-a 2025-26 LADC budget pawm tawh a ṭhiat bawk. Hengte avang hian V Zirsanga chu lungawi loin Gauhati High Court-ah a zualko ta a ni.

LADC CEM sorkar ding lai dan anga bûk leh bûknaa paih thlak awm loa Governor-in CEM atana mi dang a ruat khan chhan eng emaw tak a awmin a rinawm; politics thil tak a ni thei a, a ni lo thei bawk. A chhan chu eng pawh ni se, Governor thupek tihchhuah High Court-in a hnâwla a paih hi Larsap tan thil zahthlak a nihna lai a awm thei àwm e.

Larsap hian July 7, 2025 khan Chakma Autonomous District Council chu Indian Constitution-a Sixth Schedule tlawhchhanin Governor's Rule-ah a dah bawk a, a aiawha rorelna kengkawh turin Lawngtlai DC a ruat. Chutih laiin, political party pakhat chuan CADC-ah sorkar siamna khawp MDC an nei niin an insawi.

Governor atan hian sorkar laipuia thuneitute'n political party mi an ruat cháng a awm a, party mi ni loa ngaih an ruat cháng pawh a awm. Larsap tura ruatte chu party-a inziak lut an ni emaw, ni lo emaw, Central-a sorkar lai party-in an mi duh zawng an ruat a, political appoin-tment a ni tlangpui.

Kumin chhunga LADC leh CADC chungchanga Mizoram Governor thil tih danah pawh hian party duhsak bik an awma ngaih theih tak a ni a; ngaihdan erawh a inang lo thei ang.

Governor hi an awmna state-ah party ṭan leh duhsak bik tilang lo tura beisei an ni fo; chutih rualin, political party awmna neih an nih chuan an awmna party chu duhsak bik a awl viauin a rinawm. Larsapte hian party duhsak bik an nei rû a nih pawhin, tihlan lutuk loh a mawi a, an nihna nen a inhmeh; hei hi mipui náwlpui ngaihdan a ni ngei ang.