YMA leh PWD thawhhona thuthlung

Mizoram Public Works Department leh Central YMA chuan Mizoram kawngpuite a ṭhat zawk theihna turin thawhhona thuthlung August 8, 2025 khan an ziak a, thuthlung an ziah vawi thumna a ni. PWD aṭangin Engineer-in-Chief leh Chief Engineer (Planning) ten hming ziakin, CYMA aiawhin President leh General Secretary ten hming an ziak.

Mizorama kawngpui siamte a ṭhat zawkna tur leh a tlo theihna tura PWD leh YMA ten thawhhona thuthlung an ziak hi a lawmawm a; thuthlung an ziah chhan ang takin rah ṭha a chhuah ngei mipuite'n an beisei a ni.

PWD leh CYMA hian thawhhona thuthlung hmasa ber June 14, 2018-ah an ziak a, July 14, 2022-ah an ziah leh hnuah, a ṭum thum nan tun hnaiah an ziak leh ta a. Tuna thuthlung an ziah thar leh tak hi August 2028 thleng atan a ni.

Thawhhona thuthlung angin YMA lamin tih tur a nei a, YMA hmalakna atan PWD (sorkar) lam pawhin sum eng emaw zat an ruahman ngeiin a rinawm.

PWD leh YMA ten thawhhona thuthlung an ziah a, kum sarih chuang an lo kalpui tawhah khan eng ang takin hma hmalak a nih tih hriat chian fak a har. Mizoram hmun hrang hranga PWD hnuaia hnathawhte a ṭhat phah rêng em tihah pawh ngaihdan a inang lo thei viau ang.

Mi tam tak chuan PWD leh YMA thawhhona thutlung ziah hian hnathawh a ṭhat leh ṭhat lohah awmzia tak tak a nei loin an ngai mai thei. Chutianga ngai an awm a nih pawhin dem theih an ni bik lo mai thei, thawhhonain rah ṭha a chhuah dan an hriat miau loh chuan.

Hmasawnna hnathawhte a ṭhat zawk theihna tura YMA leh PWD ten thawhhona thuthlung an ziah hi ṭha taka bawhzui ngei a ṭul a, bawhzui ṭhat a nih loh chuan awmze nei lo, sum leh pai sên thlawnna a ni dawn. Ṭha taka bawhzui turin YMA group leh branch-te an pawimawh hle dawn a ni.

YMA hmalakna pangngai piah lama CYMA aṭanga tih tur tuk ṭhenkhat chu sub-hqrs, group leh branch tam tak tan chuan phurrit a ni ve thei. Chuti chung chuan, ram leh hnam leh mipui hmasawnna leh ṭhatna turin YMA pêng hrang hrangte'n an huam chhung ṭheuhah ṭha takin bawhzui thei se a duhawm hle.