Mizoram sorkar leh sum pûk

Mizoram sorkar chuan tun August thla tìr khan Open Market Borrowing (OMB) hmangin cheng vbc. 100 a pûk leh a, 2025-26 financial year kal mekah thla nga chhunga OMB hmanga sum a pûk vawi thumna a ni.

State sorkarin OMB hmangin April leh May-ah OMB a pûk lo a, June-ah vbc. 125, July-ah vbc. 100 leh August-ah vbc. 100 a pûk. Thla nga chhunga OMB hmanga a pûk zat hi vbc. 325 a ni a, 2025-26 budget estimate-a pûk tura ruahman vbc. 1,150 aṭangin 28.26% a ni. OMB hmanga sum pûk rulhna hi state sorkarin a hranpaa pe loin, RBI-in state sorkar account aṭangin a la (cut) mai ṭhin. OMB ni lo, thil dang hmang pawhin Mizoram sorkarin sum a pûk nual tawh bawkin a lang.

Mimal leh chhungkua a ni emaw, sorkar a ni emaw, pawisa pûk loh theih hi duhthusam a ni a, mahse, a ṭul hun leh loh theih loh hun a awm ṭhin.

Pawisa pûk chu chhungkuain eizawnna bul ṭan nan te, dinchhuah nante an hmang thei a, dinchhuahna atana hmang tawh pawh mi tam tak an awm a, hmang ṭangkai lem lote pawh an awm bawk ang.

Sorkar ang pawhin loh theih loa sum pûk a ṭul ṭhin. Sum leh pai lâk luhna nei ṭha lo Mizoram state tan sum pûk loh theih a ni lo. Sum pûkte chu ṭangkai taka hman a nih chuan ram leh hnam tan leh mipui tan thil ṭha tak, ram hmasawnna thlentu a ni thei a ni.

Sorkarin sum a pûk ṭhin hi tun hma aṭanga tun thlengin political party-te'n inbeih nan tak an hmang ṭhin. Opposition party-te'n state sorkarin sum a pûk an sawisel tlangpui a, sorkarna an chanin an pûk lo thei bik chuang lo. Kan state a rethei a, sum pûk lo thei kan ni tlat lo.

State sorkarin sum a pûk ṭhin hi political party-te chuan politics-a inbeihna atan an la hmang zel dawn. Chuvangin, sorkar hian a mamawh a, loh theih loh thil a nih chuan sum pûk inthlahrun phah lo se; mipui pawhin kan hriat thiam a ṭha ang. Sum pûkte hman ṭangkai a, hmasawnna tak tak atana hman hi a pawimawh lai chu a ni.