Dan loa Myanmar-a leiṭha tawlhrûk
Agriculture & Farmers' Welfare Secretary-in August 4, 2025-a Hnahthiala Agriculture kaihhnawih hmunte a tlawhnaah, loneitute tana siam leh lak luh leiṭha (fertilizer)-te a hmanna tur ni loa hman a tam thu a sawi.
Agriculture Secretary hian fertilizer ṭhenkhat chu Myanmar lamah thawn luh a nih thu te, fertilizer-a awm chemical ṭhenkhat chu ruihhlo hlauhawm methamphetamine siam nan hman ṭhin a nia hriat a nih thute a sawi a ni. Ngaihtuah a tithui hle mai.
India ramah state sorkar, pawl leh mimal ten ram dang nena insumdawn tawnna an kalpui ngawt thei lo; ram dang nena insumdawn tawnna chungchang hi sorkar laipui thuneihna a ni. Mizoram aṭanga Myanmar lama leiṭha thawn lut ṭhin an awm a nih chuan dan kalha thil ti an ni a, man theih an ni; man chhuah an nih theih nan thuneitute'n ṭan an lak a ngai tih a lang.
Methamphetamine (meth) hi ruihhlo hlauhawm a ni a, a man pawh a sang a, Mizoramah tam tak man a ni tawh; meth mante chu Myanmar aṭanga rawn lut a ni hlawm.
Leiṭhaa chemical awmte meth siamna atana an lo hmang a nih phei chuan leiṭha tawlhrûk hi a hlauhawm lehzual tihna a ni. Mizoram aṭanga thawn chhuah hmangin ruihhlo hlauhawm tak an siam a, chu ruihhlo hlauhawm chu Mizoramah a rawn lut leh tihna a ni a; a pawi em em.
Hetiang hi thil awm dan a nih chuan leiṭha chungchangah sorkarin na takin leiṭha a khuahkhirh a ngai tihna a ni, leiṭha la luttu, zuartu leh leitute uluk leh zing zawka endik a ṭul. Leiṭha zuartute leh leitute'n dan an zâwm em, dan loin ram dangah an thawn chhuak em, danin tih tur a tihte an zâwm ṭha em tihte endik fo ni se, dan zâwm lote chu hrem zel ni rawh se.
Aizawl leh khaw danga leiṭha zuartute leh pe chhuaktute endik mai bakah, ramri-ah checkgate ṭha tak siam a, Mizoram aṭanga bungrua leh thil dang chhuak rêng rêng khauh taka enfiah ṭhin a ṭul bawk.
Mizoram aṭanga Myanmar-a dan loa leiṭha tawlhrûk titawp turin sorkar hmalakna ringawt a tâwk lo ang, leiṭha zuartute an pawimawh tel. Leiṭha zuarte'n mawhphurhna sang tak an nei a, hlâwk lutuk leh hralh chak lutuk duh vang dan loin thil an lo ti ṭhin a nih chuan an bànsan ngei a ngai a ni.