Zalenna vawng nung zel ila

Vawiin India Independence Day a ni a, British awpna aṭanga ramin zalenna a hmuh champha a ni. He ni hi zalenna hlutzia min hriat thartirtu ni se a duhawm.

Mizote hi zalenna hlutzia tawng mektu kan ni a; tu emaw thununna khauh tak hnuaia awm a, duh ang pawha awm theih loh leh zalen loh hrehawmzia hre tawhtu kan ni.

Ram zalên loah chuan mipuite khuahkhirh an ni a, an duh angin nun an hmang thei lo a, an duh zawng apiang an sawi chhuah vek a rem lo a, nun a chêp ṭhin. Mizoramin 'rambuai' kan tawng tawh a, khatih hun laia mipui nun chêpziate rualu zawkte'n an sawi ṭhin; a hrehawm hle ang.

India ram hi mipuiin rorel tura kan duh zawng an thlan theihna ram a ni a, zalên takin ram hruaitu kan thlang ṭhin a, kan duh loh zawngte kan paih bawk ṭhin. Kan ram Danpui leh dan dang dangte'n mimal dikna chanvo an humhalh ṭha hle. Media-ahte ram hruaitute pawh na tak takin kan sawisel bawrh bawrh thei a, zalenna kan neih vang a ni. Khawvelah hian zalenna aia hlu a awm lo hial àwm e.

Hetianga zalenna leh dikna chanvo zau tak neia kan awm thei leh, danin na taka min humhalh hi kan vannei hle. Kan vanneihzia hi mipui hian kan hriat chian a, lawm nachâng kan hriat a ṭha ang.

India ramin zalenna a hmuh theihna tura theihtawp lo chhuahtu te, ram zalenna atana nun a hial hlântute an ropui tak zet a, ngaihsan leh chawimawi an phû a, kan zah hle tur a ni.

Hetih lai hian, zalenna hian mawhphurhna a keng tel a ni tih erawh kan hriat reng a pawimawh. Khua leh tui zawng zawngin zalenna hlu tak kan neih hi vawng nung turin tih ve tur kan nei a; chu kan tih tur leh kan mawhphurhna chu kan hlan chhuah ve a ngai. Zalenna kan neih hlu tak hi vawn nun zel a, a tichhe thei zawnga hmalaknate kan dodal zel a ṭul.

India-in zalenna a hmuh champhaah hian mipuite'n zalenna hlutzia ngaihtuahin hre thar leh ila; zalenna kan neih hlu tak hi vawng him zel turin kan phâk tâwkah ṭan i la ṭheuh ang u.