Rêl kawng siamnaa zangnadawmna

Bairabi-Sairang rêl kawng siamnaa ram lakah zangnadawmna la dawng lo nia insawi Sairang khaw mite'n tun hnai khan an manganna Aizawla press mite hmaah an puangzar a; August 2025 chhunga zangnadawmna pek an nih loh chuan rêl kawngin a paltlang an ram chin an hung dawn thu an puang.

An sawi danin, zangnadawmna la dawng lo hi mi 14 an ni a; an zinga mi pali chu zangnadawmna an la dawng lo a, mi 10 erawh chuan a ṭhen azar an dawng tawh. Mi 14-te zangnadawmna dawn tura thuneitute'n an chhût chhuah chu cheng vbc. 14.56 a ni.

Compensation an la dawn loh chungchangah hian Aizawl DC pisa leh Railways lam an inpuh tawn niin an sawi. DC lamin Railways lama thlen turin an ti a, Railways lamin DC-a thlen turin an ti ve thung. An harsatna hi Prime Minister leh Railways Minister hnenah an thlen tawh niin an sawi bawk.

Railways lam leh Aizawl District Collector lam an inpuh tawn nia sawi hi a mak hle; a khawi emaw zawk zawkah chuan hriat fuh loh leh dik lo a awm a nih ngei a rinawm.

Rêl kawng siamna atana ram lak leh zangnadawmna pek chungchang hi mipui náwlpui tan hriat chian a harsa a; tu nge dik a, tu nge dik lo tih hriat mai theih a ni lo.

Ram neitu nia insawite'n August 2025 chhunga zangnadawmna pek an phût leh, pek an nih loh chuan an dikna humhim turin an ram chin hung an tum hi ngaihthah chi a ni lo a; thuneitute'n rang taka bawhzuia hma an lak a ngai.

Compensation la pek loh nia insawite hi an tam lo a, thuneitute tan namnûl mai a awlsam mai thei; mahse, tlèm vang ngawta ngaihthah leh namnûl tur an ni lo. Zangnadawmna pek phûttute hi an dik a nih phawt chuan thuneitute'n an ngai pawimawh tur a ni a, an chanvo, an dawn tur ang an hmuh ngei theih nan hmalak a ṭha ang.

Zangnadawmna la pek kim loh chungchangah hian mawhphurtu an awm ngei ang a, mawhphurtute'n mi dang hnenah ben per tum loin mawh an la ngam tur a ni a, a rang lama chinfel an tum tur a ni.