Ramri hung – fimkhur a ngai

February 28, 2024 khan Assembly session-ah Home Minister put luh resolution, 'Sorkar laipuiin FMR tihtawp a tum leh Myanmar nena kan inrina, ramri hung a tum hi ṭha kan ti lo a, ti lo turin kan ngen a ni. Dik lo taka British sorkarin 'Divide and Rule Policy' hmanga Zo fate min ṭhen darh hi rorelna pakhat hnuaia kan kûn leh theihna turin hma min lakpui zawk rawh se' tih chu pawm a ni.

A chunga Legislative Assembly Resolution hi India leh Myanmar ramri hung chungchangah Mizoram sorkar dinna a la nih reng thu tun hnai khan Home Minister-in a sawi.

Indo-Burma ramri hung duh loh thu nikum kum tir lama Assembly House-a pawm a nih lai khan mipui pawhin resolution kha a thláwp ṭhup mai thei. Mahse, khami hnu kum khat êrh âwrh lek chhung hian ruihhlo tawlh hluar lutuk avang leh ruihhlo tawlh chungchang mipuiin an ngaihven tâk viau avangin mi tam tak chuan rilru inthlakin, ramri hung an duh zawk tawh mai thei bawk.

Home Minister-in Assembly House-a resolution pawm tawh chu Mizoram sorkar dinna a la nih reng thu a sawi rual hian, mipui sûkthlêk thlir chungin ram tana ṭha ber turin sorkarin ngaihtuahna an sên theih reng thu a sawi. Hei hi a pawimawh viau mai.

Thil eng emawa thutlukna lo siam tawhte hi a hun laia ṭha tak a nih pawhin, hun inher zelah a ṭhat tâwk tawh loh hun a thleng thei a; a hun lai mila insiam rem thiam te, thutlukna siam tawh pawh a ṭha zawk tura thlâk ngam a ṭul hun a awm ṭhin.

Ramri hung chungchangah pawh a ṭul a nih phawt chuan sorkar hotute hian inher rem hret an hreh tur a ni lo. A ṭul a nih chuan Assembly House-a resolution an lo siam tawh ṭhiatin, resolution dang pawh siam nawn leh mai tur a ni ang. Ramri hung hi Mizoram leh Mizote tan a ṭha ber ber em tih hi a pawimawh ber a, uluk taka ngaihtuah a ṭul.

Assembly-in resolution an siam laia ṭha ti em em, kum khat vel lek chhunga ṭha ti leh ta lo tam tak an awm ang; rilru inthlak hun chhung a rei lo. Tuna ramri hung ṭha kan tih pawh nakin lawkah ṭha lo kan ti leh thei bawk.

Ramri hung a nih tawh chuan ṭhiah leh mai mai a harsa hle tawhin a rinawm. Chuvangin, tun hnai mai ni lo, hun rei zawk, kum 10, 20, 50 leh chu aia rei zawk thleng pawha Mizo hnam kal zel tur uluk taka thlir chungin, he Mizo hnam hi kan inchhîr lohna turin ngaihtuahna sen a ngai e.