Lunglei khawpui leh property tax

Lunglei Municipal Council (LMC) hotute leh Lungleia local council tina hotute chuan August 14, 2025 khan LMC chhunga property tax khawn zel dan tur an ngaihtuah a; LC 24-a property tax la pe lote-ah August 20, 2025-a ṭanin thla khat chhung property tax khawn rûnpui neih an rêl.

LMC hi kum hnih chuang êrh âwrh chauh a la ding a, property tax a ni emaw, municipality-in a ken tel hrang hrangte mipui náwlpuiin an la hre chiang tâwk lo mai thei. LMC-in property tax an la ṭan hi a ṭha a, mahse, mi 1,500 vel chauhin an la pe nia sawi a nih avangin, mipuiin an la hre chiang tâwk lo a ni mai thei. Nasa lehzuala mipui zirtir a ṭul àwm e.

LMC hotute sawi danin, LMC-in property tax a lakte chu ward-in 80% an chang dawn a, local council-te'n 15% an chang dawn a, ward leh LC kaltlanga mipuia lêt leh tur hi 95% lai a ni. LMC bik chuan property tax buaipuina senso atan 5% chauh a chang dawn.

AMC-ah chuan property tax khawn aṭanga 80% chu khawtlang leh mipui tana hman tura tih a nia sawi a ni a, LMC-ah erawh 95% lai khawtlang leh mipui tan hman a ni tur hi a ropui a, LMC hotute mipui tana an inhawnna a ropui.

Mipui tana LMC hotute ṭhahnemngaihna leh inhawnna hi Lunglei mipui pawhin an hriat a ṭha hle. LMC property tax hi khawtlang leh mipui hmasawnna tur a ni tih hria a, phûr taka pek a âwm hliah hliah a tih theih.

Chhiah hrim hrim hi àwm lo lutuk leh uchuak lutuk te, kalphung pangngai lo lutukte a nih ngawt loh chuan kan pe hreh tur a ni lo; chhiah tel loin ram a kal thei tak tak lo tih kan chian a ngai.

Sorkarin ni tin mamawh hrang hrangte man tlâwm zawkin min leitir a; mipui khawsak awlsamna leh nawmna atana thil chi hrang hrang sorkarin a siam bawk ṭhin. Hetianga sorkarin a tih theih chhan chu mipuiin chhiah kan pek vang a ni. Chhiah kan pek hi sorkar hian kan tan bawk a hmang leh ṭhin a ni tih hria a, chhiah pek tur ang angte ui lo leh phûr taka pek hi kan tih tur a ni tih hriat reng a ṭha hle.