Covid-19 inkaihhruaina kalpui zel dan tur

Covid-19 hri leng avangin khawvelin harsatna a tawk a, India ram leh Mizoram ngei pawh he hri hian a tibuai nasa. Mizoramah hian Pathianni vawi 43 chu inkhawm ṭhulh a ni ta a, eng chen nge inkhawm thei loa kan awm dawn hriat a ni lo. 

Mizoram sor­kara thuneitute chuan Covid-19 inkaihhruaina hman mek hi an ennawn dawn hnai ang a, eng chen nge kohhran inkhawm theih loha a awm zel dawn tih te, khawpuia zan lam chhuah phal loh leh dawrkaite inkhuahkhirhna hrang hrangte pawh an ennawn tur zingah a tel ang a, kan hma­lama kan awm zel dan tur a hriat theih dawn hnai tawh ang. 

Tunah hi chuan Mizoram kil tina awmte hi ang khatin min hrut rual a la ni deuh ber a, khawpuiah bik inkaihhruaina hranpa chu awm mah se hri vei la awm miah lohna khuate leh hri avanga an buaina khuate pawh kawng tam takah inang khata kaihhruai kan ni. Hei hi a sawisel duhtu tan sawiselna awm bawk mah se, Mizorama hri vei an tlem chhan leh hri avanga nunna chân an tlem chhan pawh hi kan zavaia ang khata thuneitu lamin min enkawl vang hi a ni thui hle ang. 

Hetihlai hian Covid-19 hri awm chhung khauh taka inenkawl reng hian chhung­kaw tam tak eizawnna na takin a nghawng a, a tira kan hlauh vanglai ang maia inkhuahkhirh reng lo deuh chu a hun chho ṭan dawn niin a lang. Eng chinah hian nge inthlahdul deuh tur tih leh eng chinah nge khauh taka kal tur, tih erawh hriatthiam a la harsa deuh ang; chutih rualin kan kalphung siam rem deuh dan ngaihtuah erawh a hun ta. 

Miretheite retheihna leh an retheih belhchhah dan ngaihtuah a, sumdawngte tawrhna leh an hloh nasat dan chhût a, sorkar aṭanga thla bi hlawh la ve lote sum leh paia an tlakchhiat dan hre reng chung hian, Mizoram sorkar hian Covid-19 chungchanga inkaihhruaina awm leh tur hi ngun takin ngaihtuah rawh se.