Two wheeler taxi rawng bik siam a ṭha

Mizoram sorkar, State Transport Authority-in a ruahman angin, Aizawla two wheeler taxi rawng a vâr vek tura tih a ni a, August 18, 2025 aṭangin a vâr lo chu tlân phal a ni lo. Two wheeler taxi rawng vâr tura tih hi a rawng thlakna a ni lo a, a hmaa rawng bik awm lo, rawng bik neia tihna a ni.

Mihring phur chi lirtheite hi rawng inang a ni tlangpui a, khawpui hrang hranga tih dan tlanglâwn a ni. Inang tlanga tih hi mipui tan hriat hranna ṭha tak a ni a, inthununna atan a ṭha bawk.

Two wheele taxi-te a var vek tura sorkarin a ti ta hi a ṭha a, a lawmawm. Hun kal zelah anmahni taxi-te leh mipui tana ṭha zawk tur a nih a rinawm. Two wheeler taxi tih ṭan a nih khan rawng inang tlang lo ti nghal se duhthusam a ni a, mahse, an lo ti lo zo tawh a, sorkarin tuna a ti ta hi a ṭha e.

Kum 20 chuang kal tawhah sorkarin Mizorama taxi rawng - a dum, a chung eng ni ṭhin chu tuna hman mek ang hian a thlâk a; mi ṭhenkhatin an sawisel a, political party zingah pawh sawisel an awm. Mahse, taxi rawng thlâk kha a fuh a, Mizo mipui hi kan inchhîr lo tlangin a lang.

Sorkarin tuna two wheeler taxi rawng bik a siam hi mi ṭhenkhat chuan an sawisel ngei ang a, khawsak harsa zawk, hna hnuaihnung zawk thawk tihte chu ṭan chhanah an hmang mai thei. Ṭhenkhat chuan sorkarin mipui sum a ît vang leh sum lak luhna tur a zawn vangah an puh mai thei a, political party-te pawhin an ngai kâwi lui duh mai thei.

Mimal leh pawl/party-te'n emaw sorkar hmalakna an sawisel ṭhin hi a ṭha a, sorkar thil tih dan ṭha lote chu sawisel tur a ni. Sawisel chhan leh sawisel dan mipui nawlpui tana pawmawm bik erawh a awm. Sawiselna karah pawh thil ṭha zawk turah chuan huaisen taka kaltlang mai a ṭha bawk.

Sorkar thil tih leh hmalaknate a ṭhatna hmuh duh loh luih tlat leh a ṭhat lohna lam zawng chawpa sawisel ngawr ngawr hi a ṭha lo a; chutiang mi chu ram hmangaihtu ni loin, ram tana mi hnawksak an ni zawk ṭhin tih hi hriat tlân a ṭha e.