Thil tih ṭhat hmanga inel

Chief Minister chuan August 18, 2025-a an party inkhawma thu a sawiah, "Kan beisei chu, kalphung tharin hma kan hruai ang a, party dangin min rawn el se, a ṭha zawngin kan inel ang a, kan ramin hma a sawn phah dawn kan ti a. Chutiang awm si loa insawichhiat ngawr ngawr hi thil dik a ni lem lo," tiin a sawi.

CM-in 'a ṭha zawnga inel' leh a kaihhruai sorkar kal dan chu party dangin el se a duh thu a sawi hi a pawimawh hle. Party dangte tihelna lam ni loin, a ṭha zawnga inel tura party dangte a chona niin a ngaih theih a; party dangte pawhin 'a ṭha zawnga inel' tura chona hi rilruah nei zui se ram tan a ṭha hle ang.

Inthlan rêng rêngah hian party-a awmna nei lo, neutral-te hi an pawimawh em em a, an àwn lam apiang an chak mai ṭhin a, party mite hmang ringawtin chak theih a ni lo. Hei hi political party-te hian an hre chiang hle ang; mahse, an thil tih duh dan erawh neutral-te thinlung hnehtu a ni lo fo.

Thu dik lo leh thu dik chanve hmanga inbeih vak vak te, mahni party thil dik loh pawh ṭana sawi mawi tlat te, party dang thil tih ṭhat pawh sawisel char char leh beih ngar ngar ang chi hi a la tam hle.

'Dâwt muhlûm aiin thu dik chanve a hlauhawm zawk,' an lo ti a. Thu dik lo leh thu dik chanve hmanga party dangte beih te, party dangte thil tih ṭhat pawh sawisel a, mahni party tih fuh loh pawh sawi mawi char char ṭhin hian mipui nâwlpui, party-a awmna nei lote rilru a hmin lem lo a ni tih te, mi tam takin politics an hmuh dik loh phah a ni tihte hi pawm a hun tawh.

Politics-ah hian thu dik tâwk lo hman a thiang ta angah party hruaitu leh worker ṭhenkhat chuan an ngai a ni mai thei. Hetiang hi Mizoram mipuiin an ning tawh a, paih a hun tawh tak zet a ni.

Mizoram mipui hian kan ram politics hi thianghlim tak leh dik taka khelh ni se an duh a, an beisei. Hei hi political party hruaitute leh worker-te hian hre chiang se, mi sawisel thiamah ni loin, thil tih ṭhat hmangin han inel mawlh teh se.