HSS lecturer direct recruitment
Higher Secondary School Lecturers Association, Mizoram (HISSLAM) chuan August 18 & 19 khan badge dum an bel a; August 20-a badge dum bel leh an tum erawh chu sorkar hotute aṭanga thu lawmawm an hmuh avangin an ṭhulh.
HISSLAM hian kum 1997 hnuah HSS zirtirtu lakna direct recruitment a awm tawh lo a, higher secondary school-ah zirtirtu an indaih loh phah bakah, zirnaah a ṭha lo zawngin nghawng a nei mek niin an tarlang.
Tun hma deuha 10+2 tih ṭhin, HSS hi kum 1996 khan Mizoramah ṭan a ni a, academic session 1996-17 ah batch hmasa berte'n zirna an ṭan. MBSE hnuaia 10+2 hrim hrim chu 1995-96 session-ah ṭan a ni a, hemi kuma mite erawh chu college-ah an la kal thung.
HSS zirtirtute sawi hi a dik a nih chuan, kum 28 vel chhung HSS zirtirtu direct recuitment a awm tawh lo tihna a ni a; a rei vang vang viau. Direct recruitment a awm tawh loh rual hian, a nghet loa thawk zingah dah ngheh erawh an awm nual.
Mizoram sorkarin kum 1997 hnuah HSS zirtirtu lakna direct recruitment a nei tawh lo hi a mak hle! Hna pawimawh em em, vung taka kal mek, mi tam tak nghawng ni si, kum 28 vel chhung direct recruitment awm tawh lo hi sorkar hnathawk chi dang zingah a awm lo hialin a rinawm.
Kum 1996 leh 1997 vela sorkarin direct recruitment-a 10+2 (HSS) zirtirtu a lak zinga tam tak chu pension-in an chhuak tawh ang. Contract-a thawk dah ngheh awm nual bawk mah se, zirtirtu indaih lohna a awm lo thei lo a; HSS zirna hi a nghet loa thawkteah a innghat lian hle tih a lang.
Sorkar hna thawk tur a nghet loa lak a nih hian induhsakna a awm fo a, inelna a sang lo deuh ṭhin bawk; direct recruitment-ah erawh inelna a sang viau thung. A nghet loa thawkte dah ngheh leh ṭhin ai chuan, direct recruitment ngeia zirtirtu lak a nih hian mi ṭha, mi thiam an tam zawk a, chu chuan quality education a keng tel a ni.
HISSLAM tarlan danin, Mizoram sorkarin HSS lecturer direct recruitment-a lak a nih theih nan hmalak a tiam niin a lang. Hei hi a pawimawh avangin sorkar hian bawhzuiin direct recruitment ngeiin HSS lecturer tur lak ni se, HSS zirnain a ṭhat phah ngei ang le.