Dik taka sorkar hnathawk tur lak

Mizoram Chief Minister chuan August 22, 2025-a Mizoram Police Service Association inkhawmpui a hmanpuinaah, "Mizoram police constable recruitment neih tawh zawng zawnga belhchian dâwl ber leh fair ber tia sawi ngam constable recruitment tun hnaiah kan nei a, police 259 lak thar an ni," tiin a sawi.

Tun hnaiah police constable lak rûnpui neih a ni a, Mizorama police constable recruitment neih tawh zawng zawnga belhchian dâwl ber leh 'fair' ber tia sawi ngam a nih thu CM-in a sawi ngam hi a lawmawm.

CM-in a sawi ang hian, tun hnaia police tur mi 259 lak dan hi a fair viaua nih a rinawm a, sawiselna aiin fakna thu a langsar hle zawkin a hriat. Tute emaw chuan han sawi nâwi tur chu an hria a ni mai thei a, mahse, mipui nâwlpui aṭangin a 'fair' loh thu sawi hriat tur a awm meuh lo a, political party-te pawhin sawisel tur an hre vak lo niin a lang. Hengte avang hian tun hnaia police lakna hi a 'fair' thawkhatah a ngaih theih a; a lawmawm tak zet.

Police lakna buaipui turin state pawn lam mi rawih a nia sawi a ni a, hei hi mi ṭhenkhat chuan sorkar sawiselna remchangah an hmang niin a lang. Pâwn lam mi rawih nan sorkarin sum lo sêng pawh ni se, police lak dan a dik phah a, tute emaw duhsak bikna awm loa thil tih theih phahna a nih chuan a ṭha viau a ni.

Sorkar hnathawk tur lâknaah hian dik lo taka thil tih a nih a, a thiam leh ṭha apiangte lak an nih loh a, duhsak zawngte lak an nih hian Mizo ṭhalaite rilru a na ṭhin a, beidawnna rilru an put phah ṭhin; hei hi a pawi em em.

Hun rei tak chhung chu sorkar hnathawk laknaa induhsakna a nasa a, sawipuitu neih loh chuan tling ve thei lo tura inngaihnate ṭhalaite'n an lo nei tawh ṭhin. Hei hi siam ṭhat a ṭul tak zet a, ṭhalaite hi tihbeidawn loh a pawimawh em em.

Tun hnu zelah chuan police a ni emaw, sorkar hnathawk tur dang laknaah pawh ni se, dik taka tih zel ni tawh se, a tling leh tlak, a ṭha apiangte lak zel ni rawh se.