Halpuah khapna dan nei law law ila

August 21, 2025 khan Home Minister hoin Secretariat conference hall-ah Committee on Prevention of Firecracker and Other Pyrotechnic Materials an ṭhukhawm a; kumina hunpui lo thleng tur vuakvêta hâlpuah leh a kaihhnawih thilte khapna kalpui dan turte leh khapna dan siam chungchangte an ngaihtuah.

Ṭhutkhawmah hian Working Committee-in hâlpuah leh a kaihhnawihte khapna tur dan a duan thar (draft bill) chu a thuphungin pawm a ni a, ṭhutkhawm leh huna ennawn leh tura dah a ni.

Kum eng emaw ti kal ta aṭang khan Mizoramah hunpui laiin sorkarin thupek magistrate order hmangin halpuah leh a kaihhnawih thilte a lo khap tawh ṭhin. Mahse, a khapna dan puitling (act) a awm loh avangin halpuah, adt. chungchanga mante chu na taka hrem theih a ni loa sawi a ni. Hei hi halpuah, adt. khapnain zawm a hlawh tâwk loh chhante zinga mi a ni mai thei.

Tarlan danin, kum 2024-25 hunpui vuakvetah hâlpuah leh a kaihhnawih thil vangin mi 53 man an ni a, chu'ng zinga mi 14 chauh chu thiam loh chantir an ni. Thiam loh chantir zat hi a tlem hle mai a, halpuah khapna dan a awm ṭhat loh vang, dan tlawhchhan tur a ṭhat tâwk loh vang a nih a rinawm.

Mizoram kal zelnaah hunpui laiin hâlpuah, adt. hi khap a ni zel dawn em hriat a ni lo a, mahse, tun dinhmun ngaihtuah chuan, sorkar lam hian khap zel a tum niin a lang.

Halpuah, adt. khap zel a nih dawn chuan, magistrate thupek hmang ringawta khap loin, khapna dan neih law law a ṭul. Khapna dan siam a nih chuan, khap chin te, dan bawhchhiate hrem theih dante mumal takin a awm thei ang. Tuna Committee on Prevention of Firecracker and Other Pyrotechnic Materials-in halpuah, adt. khapna dan an duan mek pawh hi tihpuitlin ni se.

Tun hnaia thuneitute ṭhukhawm hian hunpui thleng leh tur 2025 Krismas leh 2026 kumthar vuakveta hâlpuah leh a kaihhnawih thilte khap chungchang pawh an rêl. Halpuah khap a nih leh dawn chuan thu chiang hma se, mipuiah puanzar a hma thei ang a, inzirtirna pawh a hma thei bawk ang a; hei hian awmzia a nei zawk nge ngein a rinawm.