City bus pick & drop system

State Transport Authority (STA) chuan kumin September leh October thla hian Aizawl city bus-te chu an stand-ah rei tak tak ding lo a, bus-a chuangte an chhuk kim a, chuang leh tur stand-a awm mekte an luh kim chuan tlân chhuak nghal zel tawh turin a ti. Hei hi enchhinna a ni dawn a, STA-in August 22, 2025 khan hriattirna a chhuah.

STA-in pick & drop system a siam chhan chu–city bus-a chuang ṭhinte'n awlsam leh rang zawka an tum hmun an thlen theih nan leh, traffic jam a tihziaawm theih beisei vang a ni a; mipui hmakhaw ngaia ruahman a ni.

City bus-te an stand-ah an hnunga mite an nghak chhuak kher leh rei tak tak an ding ṭhin hi sawiselna a tam tawh hle. STA-in pick & drop system kalpui a nih theih nan a enchhin dawn ta hi a ṭha tak zet a; mipui tan thil ṭha tak leh lirthei chêt velnaah awlsamna thlentu a ni ngei ang.

Tunah chuan city bus-te an stand-ah an innghak a, bus hmasain a hnunga bus a nghak chhuak kher ṭhin. Stand eng emaw zatah eng lai pawhin city bus a ding reng tihna a ni a; stand ṭhenkhatah phei chuan bus pahnih/pathum an din tlar châng pawh a awm.

City bus stand stand ṭhenkhat chu a zau tâwk lo a, city bus an dinin a chêp em em. Lirthei dang leh mipui kea kalte tan harsatna a awm ṭhin.

STA ruahmanna thar anga city bus-te'n an mi phurhte an chhuk zawh a, chuang turte luh zawh veleha an tlân nghal zel chuan eng lai pawhin stand-ah bus a ding dawn lo tihna a ni. Bus din loh chhunga mipui tana chêt velna hmun thâwl a awm thei tur hi a ṭhain a hlu hle dawn.

Enchhinna hi mipui pawhin an hriatthiam a ngai dawn. Stand-ah city bus ding mek a awm lo a nih pawhin rei lo tê nghah ve hret a ngai ṭhin dawn tih hriat lâwk a ṭha.

City bus emaw, mihring phur lirtei dangte pawh ni se, an remchanna leh hlâwkna tur hi dah len ber tur a ni lêm lo a, mipui remchanna leh awlsamna a pawimawh zawk. City bus pick & drop system hi a ṭha a, enchhinnaah tawp mai loin, kalpui chhunzawm ni ngei se a duhawm.