Thil tihdik ngam a ngai

Aizawl Bawrhsap pisaa Judicial Branch chuan, local council leh village council-te hnenah lehkhathawnin, zirlai zingah a dawng tur dik takte chauhin scholarship an dawn theihna atan annual income hriatpuina dik taka pe chhuak turin an hriattir.

Mizorama thil zahthlak tak chu sum leh hamṭhatna dang kan dawn theihna tura thil dik loa tih kan hre lo hi a ni a, hei hi a ram pum hri vei ang deuh a ni ta hial a, a pawi hle a ni. Zirlai zingah scholarship dawn theih dawn avang maia dawt sawi hreh lo tam tak an awm a, chutiang mite hnena annual income hritpuina dik lo pe ṭhin an awm lehzel hi a pawi khawp mai.

Hetihlai hian zirlai ni lem lo zingah pawh dan loa thil tih pawisa miah lo hi Mizoramah an tam tawh hle. Below Poverty Line (BPL) in hamṭhatna dawn theih an neih avanga BPL lem nih hreh miah lo tam tak an awm a, NREGA hnuaia hnathawh dante thlengin belhchian a dawl loin dawt sawi kan hreh lo ta hle niin a lang a, insiam ṭhat kan mamawh hle a ni.

Hetihlai hian 'mi lian' tia kan sawi ṭhin zingah hian kut tling loa sum lalut tam tak an awm bawk a, industry lem siam hreh loa dawt phuahchawp hmanga project lian tak tak siamte an awm a, subsidy sum ûm avanga thil awm hlei lo hmanga sum tam tham laluttute pawh an awm. Hei bakah hian sorkar official zingah dan dik loa sum lalut, eiru tia kan puhte hi eng emaw zat an awm bawk a; contractor leh supplier dik lo taka thil tih hreh lo hi tam tak an awm a, consultancy firm-te pawh sum hmuh theihna tura project dik lo leh fel lo siam mai maite pawh an awm ṭhin.

Thil hi dik taka kalpui ngam tur chuan chân ngamte pawh a ngai a, chutiang ti ngam chu mi ṭhahnem tak an la awm thung. Mahni chanvo bak it lo a, dan dik hnuaia an sum leh hamṭhatna hmuhte lungawipui mai ṭhin hi Mizo zingah mi fel tak tak an la ṭhahnem hle. Hetihlai hian mi te deuh zawk leh mi liante zingah pawh dawt phuahchawp hreh lo, thil fel lo tih tim miah lo tam tak an awm hi a vanduaithlak a; eng level-ah pawh awm ila thil dik taka tih ngam hi i zir thar ang u.