Political party-in inthlan an thlir ta

Kum 2018-ah Mizoramah MLA inthlan a ni dawn a, political party lamin he mi tinzawn hian ṭan an la a, inthlan lo awm tura sorkar ngei an inrin thu an sawi leh ṭan ta.

Rorellai Congress-in a term thumna atan an sorkar tur thu an sawi a, tunah MLA 34 an neih avang leh an hnathawh ṭhat avangin sorkar leh an inrin thu an sawi. Eptu party lama lian ber MNF-in term hnih sorkar tawh Congress chu mipuiin paih an duh tawh thu leh, a thlakna tur chu anmahni ngei an ni a, an sorkar tur thu an sawi. Party te deuh zawk nia lang ZNP leh MPC pawhin sorkar-ah tel ngei an tum thu an sawi a, BJP pawhin inthlan lo awm tur lam hawiin thawm an nei ṭan ta.

Kum 2018-ah hian tute emaw lo kalin vote an rawn thlak thut dawn a ni lo a, tuna Mizoram mipui vote neite bawk hian MLA kan thlang dawn. Mipui hian ram hruaitu kan thlan dawn hian eng hi nge tehna atan kan hman a, eng mi nge hruaitu atan kan duh, tih hi hriatthiam a harsa ngawt mai. Party politics ruihchilh kan tamzia sawi ṭhin mah ila kan inthlan dan en hi chuan kan vote ṭhin hi kan thlak kual ṭhin niin a lang a, eng chiah hian nge kan vote tur hi min thlaktir ṭhin, tih hi rin thiam pawh a harsa a ni.

Political party ngai reng, hruaitu pawh inthlak danglam lo, kalphung thar pawh nei chuang lote hi kan duh hunah kan vote a, chumite tho chu kan paih leh mai a, a thlakna turin a ngaiah kan kual leh mai ṭhin niin a lang. Engpawhnise tunah hian Mizoramin hmabak kan nei a, kum 2018-ah MLA kan thlang dawn a, chutah chuan, "Tu hi nge kan vote dawn?" tih lam aiin 'Eng vangin nge kan vote ang?’ tih lam hi ngaihtuah a ngai.

Politician chuan inthlan lam an hawi tawh a, an thusawi aṭangin chu chu a hriat theih. Mipui hian a dawna ngaihtuah chawp lo hian, tute hi nge kan ram tana
ṭha a, eng vangin nge kan vote ang, tih ngaihtuahna kan neih lawk a ṭha hle. Inthlan dawna boruak siam chawp thiam, tlin hmela kan hriat apiang vote ngawt zel lo hian, Mizoram tana ṭha ber tur hi ngaihtuah lawk thiam ila, kan vote thlak danah ngaihtuahna fim i hmang ang u.