Chawa intodelh leh mau
Chief minster Zoramthanga chuan kuminah chawa intodelh tura sorkarin ṭan a lak tur thu a sawi a, leileta siam theih zawng zawng leileta siam chuan Mizoram kham khawp buh thar theih a beisei thu a sawi a, sa-a intodelh tura ṭan lak an tum thu a sawi bawk. Hei bakah hian bamboo project chu ngaih pawimawh tur a nih thu a sawi a, he project kalpuina kawnga harsatna an tawhte a sawi rualin kum tharah chuan a ṭiak supply-tu lam pawh an phûr thu a sawi.
Mizote hi tun hma zawng chuan mahni kham khawp thar chhuak thei, hmun dang aṭanga ei leh in tur lakluh ngai loa intodelh kan ni. Ram a ṭhang a, eizawnna hrang hrang a lo piang a, lo neih kan bansan chho zel a, tunah chuan sokar laipui chawm hlawm kan ni ta deuh ber mai. Kan kham khawp buh kan thar lo a, kan ei duh em em sa pawh state pawn aṭanga lakluh ngai hial a ni.
Sorkarin chawa intodelh tuma ṭan a la tur hi a lawmawm a, hei hi a tihlawhtling thei a nih ngat chuan Mizo mipuite hian lawmthu sawina atan inthlan lo awm leh turah pawh sorkar ngai thlan nawn hi an hreh hauh lo ang. Kan intodelh loh avanga kan buaina hi a nasa hle mai a, sorkarin chaw leh saa intodelh a tum ngam hi a lawmawm a; nimahsela 'tum' ringawt hi a tawk lo a, a taka kalpui a, tihhlawhtlin ngei erawh a ṭul dawn a, sorkar tan pawh chona a ni ang.
Mau/ rua chungchang hi chu sorkarin flagship programme-a a hman mek a nih avangin a hlawhchham thiang lo a, hlawhtling ngei turin an bei ve tur a ni. Thil hrang hrangah Covid-19 hi chhuanlamah hman a remchang dawn hle tih a lang ṭan a, thil hlawhtling loah he hri leng hi kan kawk palh a nih chuan a fel lo ang.
Covid-19 a len chhungin mau chi supply-tu thlan an ṭhulh chuang lo a, a hlawhtlin ngei an duh avangin hri leng avanga sum indaih loh lai tak pawhin mau chi tender hi an kalpui tih mipuiin an la chhinchhiah tlat dawn a ni. Kan chief minister zahawm takin chaw, sa leh mau lama hmalak a tum hi Mizoram tan thil lawmawm tak a ni a; kan kham khawp ei tur kan thar chhuah a, kan economy chawikanna atana mau project kan hlawhtlinpui bawk chuan kan state pawhin hma a sawn ngei dawn a ni.