Mitdelte tan thih hnua mit pek

August 25 aṭang kan National Eye Donation Forthnight vawi 40-na hman mek a ni. Kumina Mizorama Eye Donation Forthnight hawnnaah, mitdelte'n khua an hmuh theihna tura thih hnua mit pe (donate) tura intiam Mizoramah mi 9,231 an awm tawh thu leh, sorkar kum kal mek 2025-26 bikah mi 32 an intiam tawh thu tarlan a ni.

Tarlan dan chuan, Mizoramah thih hnua mit pete aṭangin cornea 1,321 lak a ni tawh. Civil Hospital, Aizawl Eye Bank-ah mit thlak ngai inziak lut mi 391 an awm tawh a, chutih laiin, mi 593-te mit thlâk (corneal transplant) a ni tawh thung.

July 2008 khan Aizawl Civil Hospital-ah Mizorama Eye Bank hmasa ber hawn a ni a, kum 17 chuang eye bank kan nei ve ta. Eye Bank hawn ní hian mi eng emaw zatin an thih hnua mit pe turin an inziak lut nghal a, a hnuah inziah luh awm belh zelin, kum 17 vel chhungin mi 9,231 an inziak lut tawh a ni. Hetiang zat mit pe tura inpe an awm hi a lawmawm tak zet.

Mihring taksa pêng zingah mi dang taksa pêng hmanga thlak theih eng emaw zat a awm. Taksa pêng ṭha tawh lo, a nih tur anga hna thawk tawh lo a awmin, thlâk theihte chu mi dang taksa pêng hmanga thlak a ni ṭhin a; hei vang hian mi tin hi mi dang taksa mamawh thei kan ni.

Mi dang taksa aṭanga kan mamawh ṭhin Mizorama kan hriat lâr ber chu thisen a ni. Thisen pekah hi chuan Mizoram kan ṭha a, India rama ṭha ber pawl kan ni a, mi nâwlpui pawhin thisen pek chungchang hi kan ngaihven viauin a lang.

Mi dangte tana mit pek (eye donation) erawh Mizo mipui nâwlpui hian kan la hre tâwk lo niin a lang. Mi dang tana thil ṭha tih te, mi dang ṭanpuite hi Mizo thinlungah a lian em em a, mitdelte'n khua an hmuh theihna tura thih hnua mit pek hreh lo pawh mi tam tak an awmin a rinawm.

Chuvangin, mit pek chungchang mipui zirtir lamah ṭan lak lehzual a ṭul a, mawhphurtute'n ṭhahnemngai lehzualin ṭan la se. Mipui pawhin thih hnua mit pek hi thil ṭha tak a ni tih hriain, mit pe tura inziak lut awm belh zel thei se a duhawm.