Ruihhlo dan chah tuma hmalakna

Mizoram sorkar leh tlawmngai pawlte thawhhonain September 2025 aṭangin ruihhlo do beihpui thlak a ni dawn a, Myanmar lam aṭanga ruihhlo tawlhrukte dan chah tum a ni.

Ruihhlo do beihpui thlâk (special drive on drugs) tur bawhzui hian Police hotute leh Central YMA hruaitute chuan tun karah Myanmar ramri hnaiha ruihhlo luhna kâi khàn awmna khuate an tlawh a; khaw eng emaw zata khawtlang hruaitute nen inkâwmin, ruihhlo donaa thawhho dan tur an sawipui.

Special drive on drugs kalpui turah hian ruahman dan chuan, Myanmar ramri hrûl khaw tinah sorkarin police a dah dawn a; sorkar leh tlawmngai pawl chakna hmangin Myanmar aṭanga ruihhlo lo lut tur dan chah tum a ni.

Beihpui thlakah hian theihtawp chhuah ni mah se, ruihhlo tawlhruk dan chah tum hi zaa zain a hlawhtling kher lo ang tih a rin lâwk theih. Mahse, dan chah tuma hmalak a ni hi a lawmawm hrim hrim mai. Thil rêng rêngah hian hlawhtling tur chuan tum phawt a ngai a, chumi hnuah hmalak a ngai ṭhin.

Ruihhlo do leh Mizorama ruihhlo lut tur dan chungchangah pawh, dan chah vek theih a nih rin loh vanga dan chah tum loh nghal ngawt chi a ni lo a, tum ve phawt tur a ni. Ruihhlo rawn kan dang chat vek thei lo a nih pawhin, ruihhlo rawn lut a tlem phah ngei a beiseiawm.

Sorkar leh tlawmngai pawlte hian ruihhlo dan chah tuma ruahmanna an siam hi chak takin bawhzui se, theihtawp chhuahin ruihhlo do beihpui han thlak teh se.

Mizoram hmun hrang hrangah khawtlang hruaitute leh mipuiin theihtawp chhuah ṭawiawm ni bawk se; a bik takin ramri hnaih khuaa khawtlang hruaitute leh mipui an pawimawh lehzual. Police duty awm ngai lohna khuaahte pawh police dah a ni dawn niin a lang a; police-te leh khawtlang mipuiin thawhhona ṭha tak an neih a ngai dawn a ni.

Ruihhlo do beihpui thlâk a ni ang a, ruihhlo tawlhruk chungchangah eng ang taka awmze nei ngei tih kan la hre chho ang. He hmalakna aṭang hian ramri hung chungchangah pawh mi tam takin ngaihdan fumfê zawk an neih phah thei bawkin a rinawm.