Kawng sial mek vil ngun a ngai
Tlâk lama Aizawl khawpui hêlna tur kawngpui (Aizawl west by-pass road) laih mek a ni. Kawngpui thar tur laih mek danah mihring tana pawi tur a awm nia ngaiin Centre for Environment and Social Justice-in kawng laih mek chawlhtir (stay) turin tun hnai khan Aizawl District Commissioner/Magistrate an ngen.
Sihhmui-Muallungthu inkara Aizawl west by-pass road laih mek hi Tlawng lui chhak lam zela kal tur a ni a, Aizawl mipui châwmtu tui lâkna lui chhak lam zelah thui tak kawng sial a ni dawn tihna a ni.
Kawngpui thar tura lei laihna vûngte chu kawng thlang lama paih liam a nih chuan Tlawng luiah a lut ngei dawn tih a chiang. Chutiang a nih chuan nasa takin tui a nut phah thei a, Aizawl mipui tana tui lakah harsatna a thlen phah thei a ni. Hei vang hian fimkhur hle a ṭul.
Kum eng emaw ti kal ta aṭang khan Mizorama national highway-te hmun hrang hrangah zauh a ni a, kawng thlangah leivûng paih phal a ni lo chungin an paih nasa a, chu chuan harsatna a thlen tawh ṭhin. Mi tam takin sawiselin an dodal a, mahse, an zâwm ṭha lo viau ṭhin.
NH kawngpui hrang hrang laihna leivûng kawng thlanga nawr liam ṭhin a nih avanga harsatna thleng tawh ṭhin ang kha Aizawl west by-pass road laihnaah hian a thlen loh nan tun aṭanga vil uluk a ngai. Mi nuai 4 vel chenna khawpui tui tlan chhak lawka laih a nih avangin leivûng paih chungchangah khauh lehzual a ṭul bawk.
Kawngpui laih a nih hian kawng thlang lama leivûng tla tâwk a awm lo thei lo a, hei hi chu hriatthiam theih a ni. Leivûng paihna tur bik siam ṭha duh lo leh a paihna hmuna paih ṭha duh loa kawng thlanga nawr liam mai erawh hriatthiam theih a ni lo.
Aizawl west by-pass road laih mek hi thuneitute'n enfiah thuai se la, mihring/mipui tana ṭha lo leh pawi thei tur a awm a nih chuan a ṭul angin titawp lailâwk se, dik taka an thawh theih nan hma la rawh se.
Tun hnu zelah pawh Aizawl by-pass road laih mek hi sorkar lama thuneitute'n endik fo se la, uluk leh ngun takin vil rawh se. Kawng laitute pawhin dan ang takin lai se, kawng thlangah leivûng nawr liam mai mai suh se.