Department fakawm

Mizorama a hmasa ber turin Urban Development & Poverty Alleviation (UDPA) department chuan internet hmangin e-office an kalpui ṭan dawn. Paper ken kual ngai tawh loin file hi internet kaltlangin a en theih tawh dawn a, 'digital signature' hmangin sign vek a ni tawh dawn a, sorkar sum leh hun tam tak a hum thei ang.

Khawvel a changkang chho zel a, ramin hma a sawn a, information technology a lo lut a, computer kan hmelhriatna pawh kum tam a ni ta. Internet-in min luh chilh a, thil danga kan hman ṭangkai tehlul nen sorkar office lam zawk hian an chhawr ṭangkai tawk lo a; computer man to leh chak pui pui an leite pawh tun hmaa type writer hmanna ang leka hmang ṭhin office tam tak an awm.

Hetihlaia a nihna ang taka khawvel thiamna hmang ṭangkai tur leh, sorkar office kalphung mumal zawka kalpui tura UDPA lamin ke an pen hmasa ngam hi an fakawm. He thil a thlen theihna tura a mawhphurtute’n fak an phu a, thil phurawm a nih ang tluk zetin thil huphurhawm tak a ni tel dawn a, inzir ngai leh paih ngai thil tam tak a awm avangin a tirah chuan a harsa deuh ang tih a chiang.

UDPA lamin ngaihtuahna zau tak hmang a, hmasawn duha huaisen taka kawng thar an zawh ngam hi sorkar department dang pawhin entawn se, hei hi kan hmabaka kan la zuan luhna tur tho a nih vangin tun aṭanga e-office lama lut tura kan insingsak ṭan a pawimawh hle.

Mizorama a vawi-khatna tura e-office kalpui a ni tur hi ram tan pawh thil chhinchhiahtlak tak a ni a, hei hi tluang taka kalpui zel a nih theihna turin ṭan la se; inzir belh ngai zir belh a, hmasawn tumna rilru pu ngam hnathawktute an fakawm a, sorkar department dangte pawhin entawn se a ṭha hle. e-office hi chak zawk leh lang tlang zawk, hun heh lo leh man tlawm zawka sorkar hna thawhna tur a nih piah lamah eiruk dona kawng ṭha tak a ni tel thei bawk awm e.