Tute nge hnam hmelma chu?

Chief minister Lal Thanhawla chuan, contract hna duh si hralh chhawn chingte chu hnam hmelma an nih thu a sawi a, sim se a duh thu a sawi.

Mahni political party-in sorkar an kaihhruai laia he thu a sawi ngam hi chief minister hi a fakawm a, contract hna khawihtu tam zawk hi Congress mi leh sa emaw an lam hnai emaw an nih hmel. Contractor pangngai hi chuan hna an hmuhin lawm takin an thawk mai a, a leia lei turte hial pawh an zawng
ṭhin a; contract hna hralh ching hi chu contractor dik tak ni si lo hna hmu thei site hi an duh deuh ber.

Eng pawh nise chief minister sawi ang hian Mizoram hmasawnna tur tam tak hi chu contract hna chhe lutuk vangin a riral a, sum tam tak senna hnuhma chhe lutuk te, nuai tam tak khawhralna mai chang zui ta hna hi sawi tur a tam hle. Hetiang aia huatthlala chu contract hna hralh chingte hi an ni. Hna an duh a, hnathawhna tur sum an nei lo emaw an thawk peih lo emaw a ni a, pawisa awlsam hmuh duhin an hralh leh mai ṭhin. A leitu lam tan hlawkna neia thawh dawn chuan an leina man paih hnua hlawkna hmuh theih dan zawn a ngai a, hnain a tuar lo thei lo.

Chief minister hi contract hralh chhawng ṭhin hre thei tur ber a nih hmel a, a hnuaia mite vek an nih vangin tute hi nge hnam hmelma chu, tih a chhui chhuak thei ang. Huaisen taka a sawi chhuah ngam hi huaisen takin bawhzui bawk se, contract hna hralh hi thil chhui chhuah awlsam tak a ni a, he thil hi a tawp thlen theihna turin ṭan la zui rawh se.

Contract hna duh si hralh chhawn chingte hi hnam hmelma an ni ngei a, heng mi hi ruling party lamah an awm a nih chuan chief minister hian chhianchhiahin hna pe zui tawh lo se, ruling party mi leh sa kher lo pawh hetiang tih ching hi chuan hna hmu zui tawh suh se. Contract hralh chhawn chingte hi hnam hmelma an ni a, hnam hmelmaa kan puan tawhte hi chu a takin kan do zui ngam tur a ni.