Hulhliap chhawr ngei rawh se

Ruihhlo ngaite tîsa leh thlaraua enkawlna Hulhliap Short Stay Centre (SSC)-a chhuakte'n eizawnna an neih theih nan September 1, 2025 khan Hulhliap Training Centre-ah thiamthil zirna ṭan a ni a, Social Welfare Minister-in bul ṭanpuiin, thiamthil zir turin mi 80 an inziak lut.

Hulhliap Training Centre-a thiamthil zirna buatsaih hmasak bera thil zir turte hi lutte hi Hulhliap SSC thawh khatna leh thawh hnihnaa lut, awm tluante an ni a; assistant electrician, aluminium fabrication leh ei-in siamte an zir dawn a ni.

Sorkar, kohhran (Mizoram Synod) leh Central YMA hmalaknaa ruihhlo ngaite enkawlna Hulhliap SSC buatsaih a ni hi a lawmawm em em. Hulhliapa lut zawng zawngte ruihhlo sim leh nun dan dika nung tawh turin an chhuak vek lo a nih pawhin, an zinga mi eng emaw zatin ruihhlo an sim a, nun kawng dik an zawh zui a nih chuan a hlawk em em tho a ni.

Hulhliap aṭanga chhuakte'n eizawnna an neih theihna tura thiamthil zirna buatsaih a ni leh zel hi a lawmawm tak zet. Ruihhlo ngai, sim tawh, tih tur hre mai lo leh hna thawh tur leh eizawnna nei lote tan a ṭangkai hlein a rinawm a, eizawnna an neih phah theihna tur a ni. Sorkar hmalakna hi a ṭha tak zet.

Ruihhlo dona leh ruihhlo ngaite chhan chhuahna bakah, ruihhlo simte'n nun kawng dik an zawh zel theih nan te, hlawhtling taka Hulhliap Training Centre kalpui a nih theih nante sorkarin theihtawp chhuah zel se. Kohhran leh pawlte pawhin thlâwp zelin, a ṭul angin sum leh pai bakah, bungrua leh hmanruate pawhin pui thei se a ṭha hle ang.

Hulhliap SSC hi la kalpui zel tur a ni a, mi dang an lut zel ang a, ṭha taka chhuakte an awm zel ang. Chung mite tan pawh chuan sorkarin ruahmanna ṭha tak a neiin a rinawm a; Hulhliap Training Centre hi a kal zel theih nan theihtawp chhuah zui zel se.

Hulhliap Training Centre hlawhtlinna tak tak chu ruihhlo ngai dam tawh, thiamthil zir mekteah a innghat. Sorkarin duhsak taka sum leh pai sênga an tana hma a laknate hi hman ṭangkai ngei tum se, taimakna leh tumruhna nen an thil zirah theihtawp chhuahin, eizawnna tlaka thiam ngei tura an zir a ngai.