Board vice chairman-te dinhmun

MNF treasurer K Vanlalauva chuan, MNF sorkar hnuaiah board vice chairman ruat an nih chhan chu hna thawh duhna policy aṭanga chhuak niin a sawi a; board vice chairman ruat chu party dangte'n sawisel mah se, an chhàn lêt loh thu sawiin, "Board vice chairman inruat hi hnathawh duhna policy aṭanga lo chhuak a ni a, kan CM hian minister remchàn loh laia lo enkawltu tur dah a pawimawhzia a hria a ni," a ti a; board vice chairman inruat avangin hnathawh a kal mar phah niin a sawi. 

Mizorama kan la hriat ngai loh, sorkar department awm sa leh minister-te hnathawh tichaktu tur board hrang hrang 14 sorkarin a din a, MNF MLA zinga nihna la nei lo zawngte chu heng board hrang hrang vice chairman-ah hian ruat an ni. Anni bakah hian an party mi leh sa ṭhenkhat chu board vice chairman-ah hian ruat an ni bawk. MLA ni lo vice chairman-te hian hlawh an lak bakah hnathawhna tur hamṭhatna hrang hrang (facility) an nei bawk a ni. 

Heng board hrang hrang din a nih dan leh, an hamṭhatna inpekte hi mi tam takin an sawisel a, an sawisel hi thil mak a ni hran lo. Sorkar department-ah thiamna neia hnathawktu hlawh nei ṭhahnem tak an awm sa a, a enkawltu tur hamṭhatna ṭhahnem tak dawng sa minister an awm bawk a, chumi piah lama mi thiam bik pawh ni lote'n sorkar sum senga dinhmun siam chawp an luah hi kan ram sorkar sum dinhmun enin thil inhmeh ber niin a lang lo. 

An sawi anga 'hnathawh duhna' aṭanga chhuak a nih phei chuan board din belha sorkar sum sen belh kher lo hian sorkar-in hnathawh tur a ngah tawk hle niin a lang a; board vice chairman-te hian sorkar hna hi an tichak nge sorkar hna kalphung an tibuai zawk tih thlengin hunin a la hril ang.