Ram rorelna

Mizoram Assembly Budget Session chu ṭan a ni ta a, roreltute'n ram tana thil pawimawh tur an rel leh dawn. He rorel inkhawm hi television kal tlangin mipuiin an thlir thei a, chanchinbu leh media dangte kaltlangin an rorel tlangpui a hriat theih ṭhin bawk.

Hun rei tak chhung chu Mizo­rama rorelna sang ber ni si mipui ngaihven a hlawh tawk lo niin a lang a, hei hi eptu lamin ṭan an lak tawk loh vang a ni thei a, ṭan la mahse awmzia a nei lo te pawh a ni thei a, kan ram rorelna ṭhukhawm hian ram tidanglam khawp thil lian tham an rel ngai meuh loh vang a ni thei a, mipuiin ngaihven nachang kan hriat loh hrim hrim vang pawh a ni thei a, a chhan hrang hrang a awm thei ang.

Engpawhnise kan state-a rorelna sang ber ṭhukhawm hi mipui hian kan ngaihven tur a ni a, mipui nawlpuiin kan ngaihven lo a nih pawhin lehkhathiam chin hi chuan ngaihven ṭhin a ṭha hle. Dan naranin Assembly-a rorel inkhawm hi political party-a inhmang lote hi chuan kan ngaihven lo khawp mai a, mi thiamte zingah pawh ngaihsak nachang hre lo tam tak an awm. Zirlai, a bikin political science zirte tan chuan an zirlai bung khat ang a ni ve mai a, a roreltute lam an ngaisang lo a nih pawhin a rorel inkhawm hi chu ngaih­thah chi a ni lo ang.

Mahni ram rorel­na sang ber an ṭhu­­khawm a ni tih pawh hre lo hi mipui tam zawk an nih a rin­awm a, mipui lam pawh kan ngaihven leh ngaihtuah zawng kan her rem hret hret a ṭha a, ram tana thil pawimawh ngaihven nachang hriat deuh deuh a ṭha khawp mai. Hetihlai hian kan roreltute pawhin ṭan la se, mipui ngaihven tling khawp thil rel ṭhin se; mipui ngaihven loh theih loh tur khawpa kan ram rorelna an kalpui theih hlan hi a nghahhlelhawm hle a ni.