FCAA-ah eng rilru nge kan put ang
Aizawl City College Joint Students’ Union hruaitute'n September 2, 2025 khan Chief Minister an hmu a; scholarship sem theih loh chhan leh Forest (Conservation) Amendment Act, 2023 chungchang an zawtfiah.
Forest (Conservation) Amendment Act, 2023 hi Mizorama hman ve turin August 27, 2025 khan Assembly House-ah resolution pawm a ni a; sawi zui a hlawh hle a, duh loa sawiseltute leh ṭha titute tam tak an awm ve vein a hriat.
FCAA 2023 chungchanga state sorkar dinna chu CM-in Assembly House-ah chiang takin a sawi tawh a; duh lotute ṭan chhan pawh mi nawlpui chuan kan hre tawhin a rinawm. Mihring hi duh dan leh ngaihdan inang lo, ṭha tih zawng leh mawi tih zawng inang lo kan ni a, FCAA chungchangah pawh ngaihdan a inang lo a ni.
Thil awmzia zawt chiangtu ACCJSU hruaitute chu CM-in a lo hrilhfiah leh a; sorkarin a ngaihtuah ber chu mihring hmasawnna a nih thu te, FCAA chu Article 371G rahbehna a nih loh thu te, ram leh hnam hmasawnna atan FCAA pawm a ṭhat zawk thute a lo hrilh. CM sawi hi ṭhenkhatin an pawm ang a, ṭhenkhatin an pawm lo ang.
FCAA 2023 hi Mizoram leh kan hnam tan khawi emaw laiah ṭhat tawk lohna lai a awm a nih pawhin, ṭha lo hlâwm tawp erawh a ni lo a, ṭhatna leh remchanna siamtu a ni ang tih a rin theih.
FCAA ṭhat lohna lai tur emaw, duh lotute'n an hlauh lai hi hlauh tur a ni rêng em, tih pawh ngaihtuah tham tak a ni. Hlauhawm lêm lo hi kan lo hlau viau palh thei a, hlau turin mipui kan zirtir chiam thei bawk; fimkhur a ngai.
Ram hruaitute hi an thiamna te, an phâk chin te, ṭhahnem an ngaih dante a inchen vek lo ang a; mahni phâk tâwk ṭheuhah ram hmasawnna tura hna thawh duh, theihtawp chhuah duh vek an niin a rinawm.
Mizoram tana ṭha lo chu an tih ring lo tura mipui a duh thu CM-in a sawi. Mipui hian ram tana ṭha tur te, ram hmasawnna leh changkannate kan duh ang bawkin ram hruaitute pawhin an duh ang tih ring ila. Ram hruaitute aiin ram ka hmangaih viau zawkah inngai bik lo ila, ram hruaitute hi ram tana thil ṭha lo tur ti duh turah ngaih bik loh a fuh ang.