Truck neitute harsatna

Mizoram Truck Owners' Association (MTOA) chuan thuchhuah siamin, Mizoram chhungah state dang truck-te bungraw phura inhlawh an remti tawh dawn lo tih an tarlang a, "Kan state chhunga kan inhlawhfâk vena turah state dang truck an rawn inhlawh sup sup mai hi a pawi kan ti. State danga kan inhlawhfâk theih loh laia kan rama hnam dang an rawn inhlawh hian commercial vehicle-a inchîm ral a hlauhawmin kan hria," an ti. 

MTOA hruaitute chuan, kuhva rah phur ṭhinte'n hnam dang truck nen an inmawngzawm avangin state páwn truck an hman nasat thu an sawi a, "A rate chungchangah pawh inremna kan siam a, mahse, state dang truck an hmang zel tho. Sumdawnna lian thamah state dang truck an hmang nasa bawk," an ti. Mizoram chhungah truck neitute hian harsatna hrang hrang an nei ṭhin a, tuna an harsatna sawi hi ngun taka ngaihtuah a ngai awm e. Hnam dang truck-te inhlawh phal loh hi dan anga thil tih theih a ni kher lo thei a, he hian state pawna tlan Mizoram lirthei ṭhenkhat tan harsatna a thlen palh ve thei bawk; chutih rualin an thutlukna phêna thil awm hi chu ngaihthah loa ngaihtuah ngei ngai a ni. 

Mizoram truck neitute tan state pawnah phurh tur a awm lo a ni ber a, Mizoram chhungah bak an inhlawh thei lo tiin a sawi theih hial awm e. Hetihlaia truck-te inhlawhna tur ṭha tak bungraw phurh kawnga state pawn truck hlir an chhawr a nih si chuan an lungawi loh chhan hi thil lian tak a ni. Thil phurh manah inremna an siam vek tawh hnu pawha Mizoram truck ni lo zawk zel Mizoram chhungah an chhawr a nih chuan, Mizorama truck-te inhlawhna nasa takin a nghawng ngei ang. 

Truck neitute harsatna tawh piah lamah hian kuhva raha sumdawnna lian tak kalpui mek hi chhui a ṭul hle mai a, sawi neuh neuh tam tak awm karah sorkar apiangin tihngaihna an hre mang lote hian ngaih a tiṭha lo zual a; Mizoram sorkar hian truck neitute harsatna tawh hi remchanga hmangin Mzoram kal tlanga kuhva raha sumdawnna kalpui dan thleng hian en fel ngam rawh se.