ILP kan hman dan

Home department chuan Inner Line Permit (ILP) sponsor thei tura thil ṭul hrang hrangte an tarlang a, ILP sponsor-tute mawhphurhna an ziak lang bawk.

Tribal ni lo hnam dangte Mizorama an luh phalna ILP hi mi tam tak chuan Mizo hnam damna ang hialin an ngai a, ILP avangin hnam dangte'n min chim ral lo a, hnam dang sumdawng liante lo luhna tur a dâlah an ngai. ILP avang hian hmarchhak state dangte nen kan dinhmun a inan loh phah a, kan state ṭhenawm ILP hmang ve lote aiin hnam dangin min chiah piah lo zawka ngai an awm bawk.

ILP hian ṭhatna tam tak a nei a, chutih rualin ILP siam dan leh pek chhuah dante hi ngun zawka vil a ṭha hle. Mi ṭhenkhat titiah chuan ILP pe chhuaktu zingah sum lo dawng ve a, awlsam taka hnam dang hnena ILP pek chhuah ching an awm niin an sawi a, hengte pawh hi eng ang chena dik nge a nih finfiah theih a ṭha hle.

ILP-ah hi chuan a sponsor-tute hian mawh an phur thui hle a, kan hnam dang lakluhte'n an lo luh khan hna an thawk nge thawk lo tih pawh kan enfiah ngun a ṭha. Mi ṭhenkhat chuan hnam dang chhawr an duh vangin ILP an siamsak a, an chhawr duhna hna an thawh zawh hnuah an ûksâk zui lo a, heng hnam dangte hi an châm zui mai ṭhin a, hetiang mi hi tam tham tak an awm.

ILP-ah hian an hnathawh turte chiang taka ziah a ni a, ILP hmanga Mizorama lo lut hnam dangte zingah hian an lo luh chhan ni loa hnathawk zui ta an awm ṭhin a, heng mite zingah hian sumdawnna lam luhchilh ta tam tak an awm. Hengte hi thuneitu lamin ngaimawhin an enzui ṭhin tur a ni a, NGO-te'n ṭhahnemngaia an thawhin dan mitah an tling lo ṭhin bawk si a, dan anga endik theitu police lam an chet chhuah a ngai hle a ni.

ILP hi kan ram leh hnam himna atan thil pawimawh tak a ni a, state ṭhenawmte chu tunlai hian ILP hman duhin an buai mek a ni. ILP nei tawh Mizoram hian ILP pek chhuah dan, a hman dan leh vil zui lamte hi kan ngaihven ṭhat a ṭul a, ILP hi a nihna ang taka hman ṭhin ni rawh se.