Sorkar a inzir a ngai

Comptroller and Auditor General of India (CAG) Report 2014-in a tarlan danin, National Bamboo Mission (NBM) hnuaiah Mizorama State Mission director (SMD)-in Mizorama Forest Development Agency (FDA) 14 hnenah kum 2009 aṭanga 2014 chhungin cheng nuai 5804.97 pe chhuak anga a insawi laiin, FDA 14-te erawh chuan nuai 5725.98 chiah an dawng a; sum pek leh dawn inthlauhna chu nuai 78.99 a ni.

CAG report a lo chhuah chiah hian Mizoram sorkar chet fel loh hi a lo lang ṭhin a, kum tin mai sum hman dan fel lo tak tak hmuh tur a awm ziah ṭhin. Tun ṭuma National Bamboo Mission en ringawt pawh hian, thil kalpui dan fuh tawk lo a awm ngei tih a chiang a; eirukna a nih leh nih loh chu a chhuitu lamin an finfiah thei ang a, an kalpui dan erawh dan angin a ni lo hle tih report-ah hian a hmuh theih.

Mizoramah hian sorkar laipui leh hmun dang aṭangin hnathawhna tur leh ṭanpuina sum hi a lo kal ve reng a, ṭhenkhat phei chu sum ṭhahnem tak a ni hlawm. Sum lo lutte hi sorkar officer fel deuh chuan ngun takin a zir chiang ang a, a hmanna turte pawh a hre chiang ang a, a minister hnenah emaw thil awm dan chiang takin a hrilhfiah ṭhin tur a ni. Mizorama kan kalpui danah hi chuan sorkar laipui aṭanga sum lo lut hi kan inthupsiak emaw tih mai tur a ni a, a hmanna lamah pawh kan fimkhur tawk lo a, chu chu ram pumin a tuar zui ṭhin a ni.

Sorkar hian sum indaih lohna phuhruk turin chhiah thar a la a, chhiah awm sa a tipung a, sorkar sum dinhmun siam ṭhat tumin nasa takin a thawk. Hetihlai hian sorkar sum awm sa, sorkar laipui aṭanga lo kalte hman dan lam hi a ngaihthah thiang lo a, project tam tak a pamṭûl chhante hi tute emaw inthlahdah vang mai maite a lo ni ṭhin a, a pawi hle.

Mipuite tana tawrhna leh hekna thlen zawngin tun hnaiah sorkarin chhiah hrang hrang a pe a, mipui lam pawh chhiah âwl reng theih a ni lo tih hriain an pawm thiam tlangpui niin a lang a; nimahsela sorkar sum neih sa hman dan fel lo hriat reng hi mipui tan a thinurthlak a, sorkar hian sum lut leh chhuak hi vil ngun se, vil thei turin inzir peih rawh se.