Thlarau MR

Finance minister chuan muster roll (MR) awm tak tak lote hminga sum an lak ṭhin, 'Thlarau MR" an tih mai ṭhin tihbo tuma an beih nasat thu a sawi a, heng Thlarau MR hi tihbo theih a nih chuan kum khatah sorkarin cheng nuai 5,800 a hum thei dawn niin a sawi.

Hun rei tak chhung sorkar hnathawkte eirukna lian tak chu Thlarau MR tih hi a ni. Sor­karin sum leh paiah harsatna a tawh hma zawng kha chuan an en liam vel mai mai niin a lang a, tunah erawh sorkarin sum a nei lo a, sorkar sum luan ralna ṭhin an chhui chiang a, Thlarau MR a tam hle tih an hmu chhuak.

Thlarau MR tih ṭawngkam minister meuhin a hman avang hian a awm ngei tih a chiang a, hei lo liama eirukna chiang hi a awm thei kher lo ang. Sorkarin ṭan a la a, MR-te chu a tak awm an nih leh nih loh finfiahna turin Electoral Photo Identity Card tihlan kher an phût ta a, sorkar department tam tak an buai niin a lang.

Hei hi eiruk nuai bo tum sorkar tan chuan hun ṭha a ni a, Thlarau MR bo ta ringawt hi hlawhtlinna a ni lo a, tun hmaa Thlarau MR zawn chhuahna remchang a ni. Corruption a zung nena phoro an duh tak tak a nih chuan, Thlarau MR tihtawpah hian an lungawi mai tur a ni lo a, kha chen sorkar leh mipui pawisa lo eiru a, Thlarau MR chhawr ṭhintute zawn chhuah a, hrem hi sorkar tih tur a ni ang.

Kum khata cheng nuai 5,000 chuang zet hum theihna tur khawpa Thlarau MR chhawr an lo tam mai hi a pawiin a thinurthlak a, sorkar leh mipui an zah lo hle a ni. Sorkar hian sum humna tura Thlarau MR tihbo hi duhtawk mai lo se, corruption phoro tura intiam a nih angin Thlarau MR a tihbo rual hian he eirukna tenawm taka inrawlh sorkar hnathawkte hi hrem ngei rawh se.