Rêl rawn lut leh invenna lam

Bairabi leh Sairang inkara rêl kawng siam zawh tak chu Prime Minister-in a hawng ta a, khualzin phur rêl pawh a tlân ṭan nghal a, bungraw phur rêl pawh a tlân thuai dawna sawi a ni.

Mizoram chhengchhiat dan kan hria a, rêl luh theihna tura ngaih pawh a ni ngai meuh lo. Mahse, tunah chuan a rawn lut ta miau si a, a lawmawm tak zet. Sorkara thuneitu te, Railways lama hotute leh hna thawktute zawng zawng thawhrim rah a ni a, an fakawm.

Sairang thlenga rêl rawn lut hi Mizoram tana rahbi thar a ni a, hmasawnna kawnga chak zawka min hruaitu a nih ngei a rinawm. A ṭhatna te, ram leh mipuiin an hlâwkpuina tur tam tak a awm a, sawi sên a ni lo.

Mizote'n khawpui kan pan tam ber ber - Delhi, Kolkata leh Guwahati-ahte Sairang aṭanga tlan tur rêl pathum lai ruahman a ni hi a lawmawm em em. Mizoram mipui tan remchanna tam tak siamtu a ni zelin a rinawm a; Mizoram mipui pawhin a ṭha lama hmang ṭangkaitu nih tum ila a ṭha hle ang.

Hmasawnna hian thil ṭha lo lam ken tel a nei ṭhin. Khawvela hmasawnna zawng zawng hian ṭhatna tam tak a neih karah thil ṭha lo lam ken tel a nei châwk a; Sairang thlenga rêl tlan ta pawh hian thil ṭha lo lam ken tel eng eng emaw a nei ngei dawn.

Hmasawnna chi hrang hrangte hi thil ṭha lo lam an ken tel avang ngawtin duh loh chi a ni lo. Hmasawnnain a ken tel thil ṭha lo lakah te, thil sual tihna remchanga hman theih a nihna laiahte chuan fimkhur takin kan lo invêng ve mai tur a ni.

Rêl kawng hawn a nih veleha Home/Police department-in rel chawlhhmunah state pawn aṭanga rawn lutte endikna leh temporary ILP pek chhuahna a siam nghal leh, a taka an kalpui nghal hi a lawmawm.

ILP chungchang bik hi Mizo mipui tam tak ngaihven ber leh rêl rawn lut chungchanga an hlauhthawn ber pakhat a ni. ILP hi Mizo hnam himna hmanraw pawimawh tak a nih avangin police lam hian khawng takin kalpui zel rawh se.

Thil dang tam takah pawh fimkhurna tur leh invenna tur a awm ang, chungahte pawh chuan thuneitute'n chak taka hma an lak zel a ngai a ni.