Ration card-a harsatna chinfel

Hun eng emaw ti aṭang khan ration thar siam leh siamṭhat theih a ni lo a, hei vang hian mi tam takin harsatna an tâwk a, an buai a ni.

Ration card siam theih loh chungchangah hian Food, Civil Supplies & Consumer Affairs department chuan September 5, 2025 khan harsatna thlen dan a sawifiah. Tunah chuan eng eng emaw tih theih a nih tawh rualin, a pawimawh bera lang - ration card thar siam leh hming thun luh belh erawh tih theih a la ni lo.

FCSCA-in harsatna a tarlan chu, Scheme for Modernisation and Reform Through Public Distribution System (SMART-PDS) vang a ni. SMART-PDS hman dawn avangin March 2025 aṭangin ration card siam/khawih danglam theih a ni lo a, SMART-PDS hi peih a la ni bawk si lo a, mi tam takin harsatna an tawh phah a ni.

Ration card thar siam leh ration card awm mek siam danglam theih a ni rih lo hi Supply department hotute pawhin hrehawm an ti vein a rinawm a, siam theih ni thuai se an duh ve ngei ang. Mizoram bik thil a nih loh avangin an tan thil tih zung zung theih a ni lo ang tih a rin theih a; anni hi dem viau tur pawh a ni lo ang.

Chutih rualin, SMART-PDS peih hun sakuh ser nghah ngawt ngawt loa tih theih dan a awm ang em. Ration card thar siam theih loh vang leh inthun luh belh theih loh avang hian mi tam takin harsatna an tâwk ngei a; eng ang harsatna tak nge an tawh hriat a ni lo a, ṭhenkhat tan chuan harsatna lian tak pawh a ni thei àwm e.

Mipui harsatnate hi chinfel dan a awm ang em, hmalak theih dan a awm ang em tih ngaihtuah a ngai. SMART-PDS peih a ni thuai dawn a, ration card siamṭhat thuai a nih tawh dawn chuan hmalakna dang neih a ṭul lo thei. Peih hun tur sawi theih a nih loh erawh chuan, nghâk ngawt ngawt mai loa kawng dang zawn a ṭha ang.

Ration card-a harsatna hi Mizoram sorkar leh department hotute'n ngun lehzualin ngaihtuah se, mi tam tak harsatna hi chinfel dan ngaihtuah se a ṭha hle mai.