Thapui thawha HIV/AIDS do a ngai ta

Mizoram State AIDS Con­trol Society chhinchhiah danin, Mizoramah HIV hrik pai mi 10,093 an awm tawh. Tun hnaia MLA-te puala HIV/AIDS chungchang zirnaah he thu hi sawi lan a ni a, MLA zawng zawngin Mizorama HIV/AIDS darh zel tur venna atan Rs 1,00,000 ṭheuh pek an rem ti.

Mipui aiawha roreltu tura thlante'n hetianga HIV/AIDS dona kawnga ke an pen tur hi a lawmawm a, an entawntlak hle. Chutihlaiin MLA Fund meuh pawh HIV/AIDS dona atan hman a ṭul tawh a nih chuan kan sorkarin sum a nei lo hle tih a chiang a, chumi piah lamah HIV/AIDS hi a darh nasain a manganthlak hle tih pawh a hriat theih bawk.

HIV/AIDS hrik pai ve lote'n kan ngaihven lo thiang tawh lo a, mipui nuai 10 bawr vel awmnaa a hriat chian chinah ringawt mi 10,000 chuangin HIV hrik an pai tawh chuan, kan zavaia kan ṭan rual a hun tawh takzet a ni. HIV/AIDS dona kawngah hian sorkar hi kan maltlattir thiang lo a, MLA-te pawh hian a pawisa thawh ringawtah hian an tawpsan tur a ni lo a, a taka pen chhuah zel a ṭul tawh.

HIV/AIDS hi rilrua vei mai a tawk tawh lo a, a taka pen chhuah a hun ta. He thilah hian kohhran hian thapui thawh se chu awmzia a la nei thui hle ang tih a rinawm a, Mizorama kohhran hrang hrangte hian HIV/AIDS in kan ram a luhchilh thuk tawhzia hi ngun taka an ngaihtuah a, thapui thawha an pen chhuah a ngai ta a ni.

Tun ang zela HIV/AIDS hi a darh chuan a hnam pum mai hian kan dinhmun hi a chhe hle dawn tih a hriat theih a, a darh zel tur inven a, a la kai lote zirtir hi kan zavaia mawhphurhna a ni e.