Lo zawh leh agro-tourism

Mizo lo neih dan kalphungah lo zawh thla kan hmang mek a, Mizoram hmun hrang hrangah lo zo thawm hriat tur a awm. Thingtlang lama lo neite'n lo zo thei khawpa tluang taka an lote an enkawl thei ṭhin hi a lawmawm.

Kum eng emaw ti kal ta aṭang khan khaw ṭhenkhatah sorkar lama hotu - Chief Minister, minister leh hotu dangte nena lo zawhna hun hmang hriat tur a awm tawh ṭhin.

Kuminah pawh sorkar chawlh ní remchanga hmangin Hmunṭha leh Kanghmun khuaah lo zawhpui buatsaih a ni a, minister pahnih ve ve leh officer eng emaw zat an tel. Tun hnai têah Tualpui khuaah Chief Minister bakah minister pahnih, MLA dang pahnih leh sorkar officer eng emaw zat telin lo zawh a ni bawk a; hei erawh hi chu chawlh ní a ni lo thung.

Kan ram hruaitute'n lo zawhnaah hlim taka hun an hmang thei hi an lawmpuiawm a, sawisel chiam tur a ni lem lo mai thei. Ram hruaitute hian rim takin hna an thawk a, ngaihtuahna nasa tak an sêng a, chung karah chuan intihthawven leh intihhlimte an mamawh ve ṭhin; hei hi mipuiin kan hriatthiampui ve a ṭha.

Chutih rualin, chawlh ní ni loa hna pawimawh tak tak kalsana lo zawhna minister rual tel ṭhup ṭhup erawh lan mawi loh theihna a ni ve tho bawk a; a âwm tâwk hriat a pawimawh.

Kumina ram hruaitute hoa lo zawhna an buatsaih tawha sawi langsar tak chu - agro-tourism châwi kânna atan tih leh, lo zawh hmanga khualzin hîp tum a ni. Hengte hi thil pawimawh tak a ni.

Lo zawh hi hun hlimawm a ni a, hlim tak leh nuam taka hman a ni ṭhin. Mizote'n tlang ram lo neih kan kalpui dan hriatna ni paha a hun hlimawm lai ber lo zawh hi khualzinte hîpna a ni thei tak tak a nih chuan a ṭha hle ang.

Thingtlanga lo neitute leh khawtlang ringawt tan chuan lian tham taka lo zawh buatsaih reng a harsa thei a, bul ṭan pawh a harsa ang. Sorkar hian lo zawh hmanga agro-tourism lam a hawi a nih rau rau chuan ropui leh changtlung zawk turin hma la zui se, a ṭul angin sorkar sum pawh sêng hreh lo se a ṭha hle ang le.