State sum eitu Medical Reimbursement

Sorkar kum kal ta, 2014-15 chhunga Mizorama sor­kar hnathawkte medical reimbursement (MR) bill chu cheng vbc. 81.7 a ni. Chief minister Lal Thanhawla chuan, MR bill tam lutuk ṭhin chu tihtawp vat a ngaih thu a sawi a, a zir chiangtu tur an ruat tawh thu a sawi.

Mizoram sorkara hnathawkte leh an chhungte MR bill tam dan hi en liam mai chi a ni lo a, Mizoram sorkar retheihzia chhut phei chuan rang taka siam ṭhat vat a ṭul. Kum khata cheng nuai 8,000 chuang inentirna sensoa kan hmang ral hi a tam tham hle mai a, hei hi Mizoram pumpui senso ni loin sorkar hnathawkte leh an chhungte inenkawlna chauh a ni.

Mizoram sorkar hian thawh chhuah sawi tham hi a nei meuh lo a, CAG report-a a lan danin tun hnai kum nga chhung vela Mizoram sorkar sum thawh chhuah hi chawh rualin kum tin vbc 340 vel chiah a ni. Kan state sum thawh chhuah tlemzia en hian MR-a kan insenna hi a tam lulai hle mai a, sorkar hian huaisen takin kalphung thar a kalpui ngam a ngai.

Heti zat sum a luan ral danah hian a hman danah pawh thil rinhlelhawm a awm lo thei lo a, damloh chhuanlama sum dik lo taka hman a awm phei chuan a pawi hle ang. 'Phai damdawi-in ṭhenkhatin Mizo damlo an nih tawh chuan sorkara an bill leh theih avangin thil ṭul tak ni lo thlengin an test ṭhin' tihte leh, 'Damdawi-in senso tlem zawk awm reng chungin an zawmpui damdawi-in senso tam zawk kher an pan,' tihte hi thil dik a nih ngai chuan, sorkar hian a enfiah a ngai hle a ni.

Tuna a lan dan leh Chief Mi­nister pawhin Assembly House-a a sawi angin damlote bill ang apiang hi sorkar hian a pawm mai niin a lang a, hei hi chu enfel a ngai. Sorkar-a bill theih chin hi siam fel a ngai a, an damloh dan azirin an veivah theihnate pawh hi siam danglam a ṭha. Natna serious bik leh enkawl hmanhmawh thlak bik chin hi thlawhtheihnaah kal phalsak ni se; entirna'n mit (eye) ṭha lo enkawl ngaite chu thlawhtheihnaa chuang kher lo pawhin an inenkawlna hmunah kaltir se, eng natna vei pawh thlawhtheihnaa in thawn chhuah zelte hian a senso hi a titam hle a ni.

Damlo phai kalte'n an pan tur damdawi-in pawh thlan thiam a ngai a, a man to uchuak lutuk chi, mi naran inenkawlna phak loh anga kan intir liam fo pawh hi tihtawp ngam a ṭha ang. Mizoram chhungah pawh private damdawi-in lamin a ṭul chin an en nge, a bill theihna tur lam an zep tel ṭhin tihte thlengin en fiah ngam ni se a ṭha khawp mai.

MR zir chiangtu committee-te hian sorkar hnathawk nawlpuite bakah MLA-te thlengin an MR bill theih dan siam ṭhatna tur hi rawt ngam se, ram hruaitu lu ber aṭanga kan inennawn ngam chuan MR bill sang lutuk chinfel theih dan hi a la awm thei a, sorkar a huaisen erawh a ngai dawn hle a ni.