Mizo damdawite zir chian leh finfiah
Laithangpuii College of Pharmacy faculty leh research team ten Mizoram University, Mizoram Food Processing Research and Training Centre, RIPANS leh NIPER Guwahati te puihna nena kum khat chhung bâl an zirchianna report chu September 10, 2025 khan tlangzarh a ni.
Tun hma aṭang tawhin bâl hian nu hnute tui a titam theia sawi a ni ṭhin a, mahse, finfiahna (scientific proof) erawh a awm lo. Tun hnaiah Laithangpuii College of Pharmacy-in bâla hnute tui titam theitu (compound) awm dan an zir a, mihring tana chakna thlen theitu leh nu hnute tui 57%-a tipung thei a awm ngei tih an hmu chhuak.
Mizote'n a ṭha tih an sawi ṭhin, a ṭhatna dik tak finfiahna mumal tak awm si lo Laithangpuii College of Pharmacy zirtirtute leh zirlaite'n finfiaha an hmu chhuak ta hi a lawmawm tak zet a; Mizo hnam tan thil ropui tak an ti a ni. Mizoram University-a zirna-in danga mithiamte leh zirbingmite'n rannung chi thar hmuh chhuak ṭhin pawh a lawmawm em em.
Mizote hian natna tihdamna atana ṭha nia sawi eng emaw zat kan nei, mahse, finfiah (scientific proof) a ni lo tlangpui. Rûl sa hi rannung seh natna damdawi atan a ṭhaa sawi a ni a; dampui ngeia inngai an awm laiin, damdawi lam thiamte chuan an pawm lo tlangpui. Mizoramah ramhmul damdawi eng emaw zat a awm a, chungte chu ṭhenkhatin an ring a, ṭhenkhatin an ring lo.
Mizorama ramhmul damdawite leh sa lam chi, natna tihdamna atana ṭhat nia sawite hi a ṭhat dan dik tak zir chiana finfiah a la ni lo tlangpui niin a hriat; mumal taka zir chian a ṭul a ni. Damdawi atana ṭha nia sawite hi mithiamte'n chonaah ngai se, zir chiangin, a nihna dik tak finfiah thei se. A nihna dik tak - a ṭhatna emaw, ṭhat lohna emaw an finfiah thei a nih chuan hriselna lama hmasawnna rahbi thar a tling ang.
Damdawi lamah a ni emaw, thil dangah pawh, kan mithiamte hian hlawh ṭha tak neih a, mahni hna ṭha taka thawhah lungawi mai lo se, thil thar hmuh chhuah lamahte hian ṭan la thei se a duhawm. Zirna-in sang kan neiha mithiamte pawhin zirbingna lamah thûk zawka hma an lak a ngai. Sorkar pawhin zirbingna lam a ngaih pawimawh a, nasa zawka hma a lak a ngai a ni.