Sikul kalphung thlâk chungchang

Education Minister-in tun hnai khan media hmaah sikul kai hun, calendar (academic session), zirlai uniform leh zirtirtu transfer & posting rules chungchang uluk taka ngaihtuah a nih dawn thu a sawi.

Academic session leh uniform chungchangah hian sorkar sikula thawk zirtirtu pawlte chuan kumina an inkhawmpuiah an duh dan an tichiang tawh a; sorkar sikulah uniform inang tlang ni loin, sikulin an duh ang an hman an duh a, calendar year (January-December) anga kal an duh bawk.

School ṭan hun, calendar, zirlaite uniform leh transfer & posting rules chungchangah hian School Education department chuan ngaihdan thawh theihna hun a hawng a, chumi hnuah vantlang inrâwnkhawmna a buatsaih leh a ni.

Inràwnkhawmna aṭang chuan sorkar sikula zirlaite uniform chungchangah ngaihdan a thuhmun tlang viauin a lang a; chu chu sorkar sikulte uniform inang tlang hmantir lo a, sikulte chu an duh ang rawng hmantir a ni. Hei hi sorkar zirtirtu pawlte duh dan a ni a, mipui náwlpui duh dan pawh niin a lang a; sorkar pawhin sikum kum tharah chuan a tihpuitlin mai a ṭhain a rinawm.

Academic session leh sikul ṭan hun chungchangah erawh ngaihdan a phîr viau niin a lang. Tuna kal dan April - March a ni emaw, calendar year (Jauary - December) a ni emaw, ṭhatna leh ṭhat lohna sawi tur a awm nual ve ve a; sikul ṭan hun chungchangah pawh duh dan a inang lo.

Sikul ṭan hun leh calendar chungchangah ngaihdan a phîr avang leh, ṭhatna leh ṭhat lohna sawi tur a awm nual ve ve avangin sorkarin uluk leh fimkhur taka a ngaihtuah a ngai ang. A pawimawh ber chu Mizoram zirna ṭhat phahna tur a ni em, tih a ni.

Tun hma aṭangin school calendar-ah ngaihdan a inang lo tawh a, kalphung thlâk a lo ni tawh ṭhin. Zirtirtu leh nu leh pate remchanna ringawt thlir chuan January - December anga kal a remchang hlein a hriat a; India ram pum thlir erawh chuan April - March hi academic session kalphung dik zawkah a ngaih theih.

Kalphung a ṭha tâwk lo emaw, a aia ṭha zawk a awm emaw a nih chuan siam rem a, kalphung thlâk ngam a ṭha. Chutih rualin, kalphung leh tih dan thlâk zung zung a ṭha lo ve thei a, rilru nghet lo leh mumal lo zia a ni. Sorkarin fimkhur takin han ngaituah zui zel teh se.